2 TIMOTIUS GI NICAN 2 - ALLAH NIHYET MEM TUNGWATU NYA

Ningginausi tut Kristus de tentara di ningon gom

¹ He dipmot Timotius ug o! Suar ayai nisindemti tug hon Kristus Yesus di singat tut sa drek dip gi sinok gom kin Noni.

² Ma aba ditde ningginausi nya di ditri tut bak tungwatu nya imang bibor bitri tut hanyen bak yo di ingon gom nya leu binhyepo ibingginau yo di hiter bu sindam.

³ Ma atindei ser ninghuisi wei dem kep nok Kristus Yesus de tentara di ningon gom.

⁴ Tentara di tindei ser pran yai midyai nyeng can bi. Leu binhyepo pwoi nibou tentara ningon ba, joi sut noni.

⁵ Gino no di dor kak nipuig bibeheu gau hiter pigau hanjop bibit nidimig sutti nya bi ne bit bon noni tug ndei munkwas ei nipekti kan bi.

⁶ Dem mem gima no di ta nibou ei niyai miaiti yem njita di hei ei miai dimati bibie.

⁷ Ma akan-kan nyen tut nipingokti dini di dipai hwou bina lewo Tuhan misindem tut na leu binhyepo angon dorti.

⁸ Ma ayok ngon kep bipia Nihyet Di Kei di ditri tut dima tut Yesus Kristus di ntun Daud him. Noni ne Kristus di kiju hanyen leu nimai eisi ri.

⁹ Diyai ninghuisi wei drek dip gi ditri tut Nihyet Di Kei tug hon nibou pemerinta nya di iba lante biteu dimig kin dinda dem kep nok no di sibut. Noro bit bon iba lante biteu Allah nihyet kan bi.

¹⁰ Gima rino diba dibou coi mem mun di buhun tak da hagom leu binhyepo yo di Allah dimig yok ei su nya igyai niteu leu sisarti kin niyaijo nijep ba, ipriet kin Allah nikei-kau-keisi di jo kikau tug hon Kristus Yesus.

¹¹ Mun di dipas kep dini jug ne nijit ri. “Gino nyeni imai bit Kristus ne igyai niyaijo nijep bit Noni.

¹² Gino iba ibou coi mem mun di buhun tak nye lene inok nibou mem ninyeng tak kepti bit Noni. Gino ibikep ser Noni lene Noni cem mibikep ser nyeni.

¹³ Gino ingon gom tut Noni bi lene Noni ningon gom kikau lewo bit bon bikep ser Nonti kan bi.”

Ningginausi tut awak di joi bibor

¹⁴ Ma abiwin kep yo di mbusyamei ingonti tut mun dini hagom. Ma asok kep yok ngkiem ei Allah niyai him ser nhyema iliriem yam tut mumpui hyet di bon ninyeng bi nya au. Mumpui hyet dima mpu tungwatu nya bi sren noro binggek tut ingonti.

¹⁵ Ma abrim angkek nok mungkun kei leu binhyepo Allah joi sut nani bitut ade midyai nya cem leu api ammai sut bi. Noro aba nisinati di mungkun kei bitri tut Allah nihyet di nijit.

¹⁶ Ma ambres nanti leu nihyet minyei kin mun di tungwatu nya iba ighyet dahat yam tut di bon ninyeng bi. Lewo mun dima yok hagom bindei ba, tungwatu nya ingkwei leu Allah.

¹⁷ Lewo ighyet dima jus yamti nok bras di yem tungwatu nya. Ibou can di itri tut nihyet dima rino Himeneus kin Filetus.

¹⁸ Yo cin dini ikrau tunggwei puig di nijit binggek tut yo di ingon jo kep nya ibou poi ide niba ningon com Kristusti ba, itri tut bipia nikiju hanyen leu imai eisi njiriek leu su.

¹⁹ Noro cou nipmem di Allah ta ei su dima nddong kei ba, bit bon tungwatu nya ikit-kit nyen kan bi. Srat bokti di jo ei cou nipmem dima dip pai “Tuhan kan igbit Nide limwa nya.” Ba, hi kin bu pai “Ma tungwa tou rino pai sut nonti bipia noni ne Allah de limwa rin mbres nonti leu mun di kinei hagom.”

²⁰ Lewo dem kep ndigban di jo ei ig ndig bibor ba, den kin bokor di iba perak kin mas kin biei kin igtuyap bibon. Ibet gi hi di kei bibor nya ei mem njap nindig lo, ibimangkrei gi hi di ugwai-gwai nya bikwop njap-njap.

²¹ Tungwatu tou rino mbres nonti leu mun di ugwai-gwai nya noyam kin mun di dia-diau kei di niceu bet ei mem njap nindig. No dima ningon gom tut Allah bipwoi ningon cem ba, tin ei mem gima yai kep midyai di kei bibor nya hagom.

²² Ma ambres nanti leu mun di pilei nya ingat ingwes eisi. Ma ahuk bram angon di sren kin ade niba ningon com Kristusti kin angon ngakei tungwatu nyati kin angon jo nyahanti hagom noyam kin yo di ingon kwes di yahara Allah mem gima mpu yok.

²³ Ma abicom yam bit yo di ingon mbum nya di iba ighyet dahat yam tut mun di bon ninyeng bi nya au. Akan tut bipia mun dima yok ribindei dino tungwatu nya itte tut yam.

²⁴ Ma Tuhan de awak nya itte tut tungwatu nya nyen au. Noro ma isingat tut hiter bingginau yok kan cem ba, ingon jo nyahan.

²⁵ Ma iba ingon di nggriu binyohou pingok yo di isrep tut yok nya ingonti. Mpaba Allah bon nituti mem yo dima ittin ser ide sisar ba, ingon jo kep nihyet di nijit.

²⁶ Mpe dima lene intin kimbou hanyen leu api ingwes ngun leu Bilis de bon di srou yok di bindei ba, ibit ningon kanti.