NIBOHON MBEN ISRAEL GI NICAN 22 - ALLAH NIHYET MEM TUNGWATU NYA

Ahazia di nok Nibou Ndig mem timiei Yehuda nya

¹ Nipou yo lene nimpung tentara Arab gom icoi bihwen timiei Yehuda nya ba, ibiyai nimai bak Yehoram nipmot bat nya yahagom lo, Ahazia nongkom ngat he rino ningwes ngun leu api timiei Yerusalem nya ikon noni ba, kui bigwam nok nibou ndig biya luei nicig nohoti.

^2-3 Ahazia kui bigwam nok nibou ndig mpe dino nide njap ug ei ari bingwam nyatungwagom ba, can ba, ninyeng tak kep ei minu ndig Yerusalem mem nijam ari bingwam gom ngat he. Ahazia cem yai bram Nibou Ndig Ahab nide bat nya igyaisi. Lewo nipmem Atalya pingok ningonti leu binhyepo bon mun di kinei bibor nya. Atalya dima ne Nibou Ndig Ahab nipmisop ba, nignyon ne Omri di nibou ndig mben Israel ri.

⁴ Ahazia bon sisar tut tuhan noyam kin Nibou Ndig Ahab nide bat nya ibonti cem. Lewo yoni rino ipingok kep ningonti tirigi nicig nimai leusi. Yo di ipingok kep ningonti dima rino ibindei di cut ei mun di kineiti ug a.

⁵ Ipingok kep Ahazia ningonti apino noni bicom yam bit Yoram di nok nibou ndig mem mben Israel mem gima ikon pran bit Hazael di nok nibou ndig mem mben Siria. Ikon pran bit yam ei minu ndig Ramot ei Gilead leu api tibor gom ndei Yoram bibok ei pran dimati.

⁶ Gima rino noni ngkwei hanyen ug ei Yizreel leu binhyepo hi mpu no tut nibokti ei sirima. Jei bi lene Ahazia ug bisis ser noni.

Yehu yai nimai bak Ahazia

⁷ Allah kos tut ei su bipia Ahazia de njap mingwig hon mpe dino noni ug bisis ser Yoram di nggwen nibok pima. Leu api Yehu di Nimsi nipmot gom hwen bit Yoram Ahazia nya ei mpe di Ahazia ug bisis ser Yoram pima. Lewo tuhan dimig Yehu ei mem gima ba noni bicok tut yo di intun Nibou Ndig Ahab him yahagom.

⁸ Tirigi Yehu bindei mbut hukum leu Allah pima ei yo di intun Ahab him dip lene ug um siceu nimpung gom. Yo dima ne nibou timiei Yehuda di inyeng jei nya kin Ahazia ninggwo bat nya di ibit Ahazia bikwei bisis ser Yoram pima ri. Yehu yai nimai bak yahagom hak.

⁹ Lene Yehu cuk limwa nya ba, yuug nggok ser Ahazia di nang biku no nyahan ug ei minu ndig Samaria leu su. Tirigi inggok Ahazia bingat ningat tu lene ibuwak kwei bak Yehu leu api Yehu yai nimai bak noni cem. Mbro nok gima lo, itig bit leu igyai kepti lewo ibou cut bak nignyon Nibou Ndig Yosafat po ba ningon di gom boom nonti binok awak mem tuhan hak pima. Ahazia nide bat nya hi dem mem gima ba nokep ninyeng tak kepti di icig mai leu dima hanyen bi.

Atalya di nok sop nibou ndig mem timiei Yehuda nya

¹⁰ Tirigi Atalya miap tut bipia nipmot Nibou Ndig Ahazia mai su rino cuk tentara nya leu binhyepo igyai nimai bak Ahazia nide bat nya di ibong ei minu Yehuda yahagom.

¹¹ Yoseba di Ahazia nikwohop gom ngat wak imam gom. Mpe dima lene noni teu Yoas di Ahazia nipmot mien nyahan leu nibou ndig nimunggwom bat di Atalya tin ei mem gima yai nimai biyok dima ikieti. Noni nang tut leu api iku munggwom dima bit no di nyohou noni nyahan hak ei nghim nsi gom ei tuhan De Ig. Nok gima lene Yoseba bindei ba, Yoas ningwes ngun leu nidrot Atalya di miyai nimai bak dima ninda nsi.

¹² Lene iku Yoas nyahan hak ei tuhan De Ig dima mem nijam ari bingwam muhwindagom di Atalya ninyeng tak kep nok sop nibou ndig dima.