مزامیر 9 - کیتاب مقدّس به گیلکی (رشتی)

خودا عیدالتٚ اَمرأ داوری کونه

پیله رهبرٚ وأسی کی سرود خوأنأنَ هیدایت کونه. «موت‌لَبِنٚ» آهنگٚ اَمرأ. داوودٚ مزمور.

¹ ترَ، اَی خوداوند، تومامی می دیل و جانٚ اَمرأ شوکر کونم؛ تومامی تی عجیبٚ کارأنَ اعلام کونم.

² تی وجودٚ وأسی شادی و خوشحالی کونم؛ تی نامَ، اَی خودایٚ موتعال، ستایش کونم.

³ وختی کی می دوشمنأن پسأ پسأ شیدی، بأزین تی ورجأ نتأنیدی خوشأنٚ پا سر بِئسید و هلاکَ بیدی.

⁴ چونکی تی حوکم می وأسی عیدالت و اینصافٚ اَمرأ بو؛ تو تی تختٚ پادشایی سر نیشته‌یی و عیدالتٚ مره‌یم داوری بوکودی.

⁵ قومأنَ توبیخ بوکودی و شرورٚ آدمأنَ جٚه بین ببردی؛ اوشأنٚ نامَ محوَ کودی تا آخرٚ دونیا.

⁶ دوشمن تا اَبد نابودَ بوسته، اوشأنٚ شهرأنَ جٚه ریشه بکندی؛ اوشأنٚ نام اویرَ بوسته.

⁷ امّا خوداوند خو تختٚ سر نیشته تا اَبد؛ خو تختَ داوری کودنٚ وأسی برقرار بوکوده.

⁸ اون، دونیایَ عدلٚ اَمرأ حوکم کونه، و قومأنَ اینصافٚ مره داوری کونه.

⁹ خوداوند، ستم بیده آدمأنٚ رِه ایتأ بولندٚ قلعه ایسه ایتأ جان‌پناه‌ سختی‌یأنٚ موقع.

¹⁰ اوشأنی کی تی نامَ شنأسیدی ترَ توکل کونیدی، چونکی، اَی خوداوند، اوشأنی‌یَ کی تی دونبأل گردیدی به حالٚ خودشأن ننَه‌یی.

¹¹ خوداوندَ کی صهیونٚ دورون خو تختٚ سر نیشته، ستایش بوکونید! و اونٚ کارأنَ قومأنٚ میأنی اعلام بوکونید.

¹² چونکی خوداونده کی خونٚ اینتقامَ فیگیره، ستم کشٚ آدمأنَ به یاد اَوره؛ اوشأنٚ ایجگره صدایَ جٚه خأطر نبره.

¹³ اَی خوداوند، مرَ لطف بوکون تو کی مرَ مرگٚ دروازه‌یأنٚ جأ نجات دیهی، اذیت و آزاری‌یَ کی دوشمنأنٚ دسٚ جأ دینم، بیدین،

¹⁴ کی تومامی تی عجایبٚ کارأنَ صهیونٚ شهرٚ دروازه‌یأنٚ جأ اعلام کونم و تی نجاتٚ وأسی شادی کونم.

¹⁵ قومأن او چاه دورون دکفتیدی کی دیگرأنٚ رِه بکنده‌بید، ینی خوشأنٚ پا اَمرأ هو دامٚ میأن گریفتارَ بوستید کی جیگا بدَه‌بید

¹⁶ خوداوند خو داوری اَمرأ خودشَ بشنأسأنه، شرورٚ آدمأن هو دامٚ دورون دکفیدی کی خوشأنٚ دسٚ مره چأکودید. سِلاه

¹⁷ اوشأن شیدی جهندمٚ دورونی، تومامٚ قومأنی کی خودایَ جٚه خأطر بریدی.

¹⁸ چونکی فقیرٚ آدمأن هیوخت جٚه خأطر نیشیدی، و ستم بیده آدمأنٚ اومید تا اَبد پا برجا مأنه.

¹⁹ ویریز، اَی خوداوند، ونأل اینسأنٚ نفس پیروز ببه؛ ببه کی همه‌یٚ قومأن تی ورجأ داوری بیبید.

²⁰ اَی خوداوند، ترس قومأنٚ جانٚ دورون تأود کی اوشأن بفأمید، فقط اینسأن ایسیدی و بس.