مزامیر 8 - کیتاب مقدّس به گیلکی (رشتی)

خوداوندٚ جلال و عظمت

پیله رهبرٚ وأسی کی سرود خوأنأنَ هیدایت کونه. «گیتّیتٚ» آهنگٚ اَمرأ. داوودٚ مزمور.

¹ اَی یهوه، اَمی سرور، چی عظمتی دأره تی نام تومامی زیمینٚ سر! تو تی جلالَ آسمانأنٚ جور قرار بدَیی.

² تی دوشمنأنٚ وأسی کوچه جغلأن و شیرخورٚ زأکأنٚ زبانٚ اَمرأ حمد و ستایش بنا بوکودی، تا کی دوشمنأن و اوشأنی‌یَ کی خوأستید اینتقام فیگیرید، ساکیتَ کونی.

³ وختی تی آسمانَ فندرم کی تی دسأنٚ مره چأکوده بوبوسته، و ماه و ستاره‌یأنی کی تو قرار بدَه‌یی

⁴ گمه: اینسأن چیسه کی تو اونٚ رِه فیکر کونی و بنی‌‌آدم کی اونَ توجه کونی؟

⁵ تو اونَ ایتأ پیچه بیجیرتر جٚه فرشته‌یأن چأکودی و تاجٚ جلال و ایحترام اونٚ سر بنَه‌یی.

⁶ اختیارٚ چیزأنی کی تی دسٚ مره خلق بوکودی، اونَ فأدَه‌یی و همه چی‌یَ اونٚ پا جیر بنَه‌یی:

⁷ تومامٚ گاب و گوسفندأن و هَطویم صارا جانورأن،

⁸ آسمانٚ پرنده‌یأن، دریا مأیی‌یأن و هر موجودی‌یم کی دریا دورونی دواره.

⁹ اَی یهوه، اَمی سرور چی عظمتی دأره تی نام تومامی زیمینٚ سر!