مزامیر 34 - کیتاب مقدّس به گیلکی (رشتی)وأچیشید و بیدینید کی خوداوند نیکویه داوودٚ مزمور، او وختی کی اَبیملکٚ ورجأ خورَه به دیوانگی بزه تا کی اونَ بیرونَ کودیدی و اونم خو رایَ بیگیفته بوشو . 1 خوداوندَ همه وخت موتبارک خوأنم؛ اونٚ ستایش کودن همیشه می زوانٚ سر نهَه. 2 می وجود، خوداوندٚ وأسی ایفتخار کونه؛ فقیرأن بیشنأوید و شادی بوکونید. 3 می اَمرأ خوداوندَ جلال بدید، اونٚ نامَ همدیگرٚ اَمرأ بولندَ کونیم! 4 خوداوندَ دوخوأدم، و می جوابَ بدَه؛ اون مرَ تومام می ترسأنٚ جأ خلاصَ کوده. 5 اوشأنی کی خودایَ فندریدی، اَشأنٚ دیم نور وأره؛ و اوشأنٚ رو هیوخت شرمنده نیبه. 6 من، فروتنی اَمرأ ایجگره بزم و خوداوند می صدایَ بیشنأوسته و مرَ تومامٚ می سختی‌یأنٚ جأ نجات بدَه. 7 خوداوندٚ فرشته اوشأنی کی خودا جأ حیساب بریدی، دور و ور ایسه، و اوشأنَ نجات دهه. 8 وأچیشید و بیدینید کی خوداوند نیکویه؛ خوشا بحالٚ اونی کی خودا ورجأ پناه بره! 9 اَی خوداوندٚ موقدّسٚ آدمأن، خودا جأ حیساب ببرید، چره کی اوشأنی کی اونٚ جأ ترسیدی هیچی کم و کسری نأریدی. 10 جوانٚ شیرأن موحتاجَ بیدی و اوشأنَ ویشتأ کونه ولی اوشأنی کی خودا دونبأل گردیدی، خوروم چیزأنٚ جأ هیچی کم نأریدی. 11 اَی زأکأن، بأیید می گبأنَ گوش بوکونید، کی خوداوندٚ جأ حیساب بردنَ شمرَ یاد بدم! 12 کیسه کی حیاتَ ناجه دأره و دوس بدأره خوروم روزأنٚ زیادی زندگی بوکونه؟ 13 تی زوانَ بدی جأ دور بدأر و تی لبأنَ گول زِئنٚ جأ. 14 بدی جأ رو وأگردأن و خوروم کارأنَ پیشَ گیر، آرامشٚ رِه وأمج و اونٚ دونبأل بوبو. 15 خوداوندٚ چوم پارسا آدمأنَ فندره و اونٚ گوش، اَشأنٚ کومکٚ ایجگره صدایَ ایشنأوه. 16 ولی خوداوند، خو رویَ بدکارأنٚ جأ وأگردأنه کی اوشأنٚ نام و نیشأنَ زیمینٚ جأ اوسأنه. 17 دوروستکارٚ آدمأن ایجگره زنیدی و خوداوند ایشنأوه؛ اوشأنَ جٚه تومامی اوشأنٚ سختی‌یأن آزادَ کونه. 18 خوداوند، دیل بشکفته آدمأنٚ ورجأ ایسَه و کسأنی‌یَ کی خوشأنٚ اومیدَ جٚه دس بدَییدی، نجات دهه. 19 دوروستکارٚ آدم زیاد سختی کشه ولی خوداوند اونَ تومامٚ سختی‌یأنٚ جأ خلاصَ کونه؛ 20 تومامٚ اونٚ خاشأنَ حفظ کونه، ونأله ایتأ دأنه‌یم بشکفِه. 21 شرارت، شرورٚ آدمَ هلاکَ کونه، و دوروستکارٚ آدمٚ دوشمنأن محکوم بیدی. 22 خوداوند خو خدمتگوزارأنٚ جانَ نجات دهه؛ هر کی اونٚ ورجأ پناه ببره، هیوخت محکوم نیبه. |
© 2010-2019 Gilak Media
Gilak Media