مزامیر 23 - کیتاب مقدّس به گیلکی (رشتی)

خوداوند می شبانه

داوودٚ مزمور

¹ خوداوند می شبانه؛ هیچی‌یَ موحتاج نبم.

² سبزٚ علفزارأنٚ میأنی مرَ خوسأنه؛ آرامٚ آبأنٚ ورجأ مرَ هیدایت کونه.

³ می جانَ تازه کونه و خو نامٚ وأسی مرَ راستٚ رأیأنٚ دورون هیدایت کونه

⁴ وختی‌یم تنگٚ دره ظولمأتٚ جأ دوأرم، بدی جأ نترسم، چره کی تو می اَمرأ ایسه‌یی. تی عصا و چوبدسی مرَ قوّتٚ دیل دهیدی.

⁵ می دوشمنأنٚ چومأنٚ جُلُو مِره سفره وشأنی، می سرَ روغن وأسِنی و می جامَ پورَ کونی.

⁶ رأس رأسی تومامٚ می ایامٚ عمر تی خُبی‌یأن و موحبت می اَمرأ ایسه منم اَی خوداوند، تی خانه دورونی ایسَم تا کِی می سر زنده‌یه.