مزامیر 20 - کیتاب مقدّس به گیلکی (رشتی)خوداوندٚ اینتخاب بوبوسته پادشا پیروزی پیله رهبرٚ وأسی کی سرود خوأنأنَ هیدایت کونه. داوودٚ مزمور. 1 خوداوند سختٚ روزأنٚ دورون تی جوابَ بدِه! یعقوبٚ خودا نام، تی جأ موحافظت بوکونه. 2 ببه کی خو قُدسٚ جأ تِره کومک اوسه کونه و کوهٚ صهیونٚ جأ ترَ حمایت بوکونه! 3 تومامٚ تی پیش‌کشی‌یأنَ به یاد بأوره هَطویم تومامٚ قوربانی‌یأنی‌یَ کی وأستی بسوجأنی قوبیل بوکونه. سِلاه 4 تی دیلٚ ناجه‌یَ ترَ فأده و تومامٚ تی نقشه‌یأنَ به انجام فأرسأنه. 5 تی نجاتٚ وأسی شادی اَمرأ آواز بخوأنیم و اَمی پرچمأنَ اَمی خودا نامٚ مره بوجور ببریم. خوداوند تومامٚ او چیزأنی‌یَ کی اونٚ جأ درخوأست بوکودی ترَ فأده! 6 هسأ بفأمستم، کی خوداوند خو مسح بوبوسته پادشایَ نجات دهه؛ خو موقدّسٚ آسمانٚ جأ اونٚ جوابَ دهه خو راستٚ دسٚ قوّتٚ اَمرأ کی نجات دهه. 7 اَشأن، به خوشأنٚ ارابه‌یأن گولاز کونیدی و اوشأن به خوشأنٚ اسبأن، ولی اَمأن اَمی خودا یهوه نامَ دوخوأنیمی! 8 اوشأن زانو زنیدی و کفیدی ولی اَمأن ویریزیمی و بپا ایسیمی. 9 اَی خوداوند، پادشایَ نجات بدن! روزی کی ترَ دوخوأنیمی، اَمی جوابَ بدن! |
© 2010-2019 Gilak Media
Gilak Media