مزامیر 12 - کیتاب مقدّس به گیلکی (رشتی)

خودا، دوروستکارأنَ حمایت کونه

پیله رهبرٚ وأسی کی سرود خوأنأنَ هیدایت کونه. داوودٚ مزمور. سازأنی اَمرأ کی هشت‌تأ سیم دأریدی.

¹ اَی خوداوند، نجات بدن، چونکی هیچ آدمٚ با دین و ایمأنی باقی نمأنسته مردومأنٚ میأنی وفادارٚ آدمأنم محوَ بوستید.

² همه‌تأن کس‌کسَ دورُغ گیدی و اوشأنٚ لبأن الکی قوربأن صدقه شوئون و دو رویی اَمرأ گب زنه.

³ ببه کی خوداوند تومامٚ لبأنی کی الکی قوربأن صدقه شیدی وأوینه و زوانی کی گولازٚ اَمرأ گب زنه،

⁴ اوشأنی کی گیدی: «چرب‌زوانی اَمرأ پیروزَ بیم اَمی زوانم اَمی اَمرأیه، کی تأنه اَمی سرور ببه؟»

⁵ خوداوند فرمأیه: «فقیرأنٚ مال و منال غارت بوستنٚ وأسی و ستم کشٚ آدمأن آه و ناله رِه هسأ ویریزم، و اَشأنٚ رِه او رفاه و امنیتی‌یَ کی ناجه دأریدی، فأدم.»

⁶ خوداوندٚ گبأن خالص ایسه، نقره‌یَ مأنه، کی گیلٚ کوره دورون تصفیه بوبوسته و هفت وار پاکَ بوسته.

⁷ اَی خوداوند، تو ستم بیده آدمأنَ حفظَ کونی؛ تو اَمرَ اَ نسلٚ بدٚ جأ تا اَبد موحافظت کونی.

⁸ شرورٚ آدمأن همه جا فأرسیدی، وختی کی پستی و رذالت آدمأنٚ میأن ارزش پیدا کونه.