متّی 16 - کیتاب مقدّس به گیلکی (رشتی)درخوأستٚ نیشانه‌یٚ آسمانی 1 او وخت فریسیأن و صدّوقیأن بموییدی عیسی ورجأ کی اونَ ایمتحان بوکونید. هَنٚ وأسی اونٚ جأ بخوأستیدی تا ایتأ نیشانه‌یٚ آسمانی اوشأنٚ رِه بأوره. 2 عیسی در جواب بفرمأسته: «اگه غروب دم آسمانٚ رنگ سورخَ به، شومأن گیدی ‹هوا خُب به› 3 و صُبٚ دم اگه آسمانٚ رنگ سورخ و بیگیفته ببه، گیدی ‹ایمروز هوا خرابَ به›. شومأن کی تأنیدی جٚه آسمانٚ رنگ و رو، هوایَ پیشبینی بوکونید، چوطو نتأنیدی اَ زمانه نیشأنه‌یأنَ بفهمید؟ 4 اَ نسلٚ شرور و زناکار نیشأنه خوأیه، ولی نیشأنه‌یی اوشأنَ فدَه نیبه جز نیشانه‌یٚ یونسٚ نبی.» بأزین اوشأنَ ترکَ کوده و خو رأیَ بیگیفته بوشو. فریسیأن و صدّوقیأنٚ خمیرمایه 5 وختی بوشوییدی دریاچه او طرف، شاگردأنَ خأطرَشو بو کی خوشأنٚ اَمرأ نان ببرید. 6 عیسی اوشأنَ بوگفته: «شیمی حواس جم ببه، جٚه فریسیأن و صدّوقیأنٚ خمیرمایه دوری بوکونید.» 7 بأزین اَشأن همدیگرٚ اَمرأ بوگو مگو بوکودیدی و بوگفتیدی: «چون اَمی اَمرأ نان نأوردیم، اون اَ گبَ بزه.» 8 عیسی بفهمسته و اوشأنَ بوگفته: «اَی سوست‌ایمأنأن، چره نان نأوردنٚ وأسی بوگو مگو کونیدی؟ 9 هنوز نفهمیدی؟ او پنج‌تأ نان و پنج هیزار نفر شمرَ خأطرَ شو، کی چن‌تأ سبد خورده‌نان جمَ کودیدی؟ 10 یا، او هفت‌تأ نان و چار هیزار نفر و اَنکی چن‌تأ زیبیل پورَ بوسته‌بو؟ 11 پس چره درک نوکونیدی کی شمرَ درباره‌یٚ نان گب نزِئن درم؟ بلکی بوگفتم کی جٚه فریسیأن و صدّوقیأنٚ خمیرمایه دوری بوکونید.» 12 او وخت بفهمستیدی کی اوشأنَ درباره‌یٚ فریسیأن و صدّوقیأنٚ تعلیمٚ دَئن هشدار بدَه، نه درباره‌یٚ نانٚ خمیرمایه. پطرس در موردٚ مسیح شهادت دهه 13 وختی عیسی نواحی قیصریه فیلیپُسَ فأرسه، خو شاگردأنَ وَورسه: «مردوم چی گیدی، اینسأنٚ پسر کیسه؟» 14 اوشأن جواب بدَه‌ییدی: «بعضی‌یأن گیدی یحیایٚ تعمیددهنده‌یه. بعضی‌یأن گیدی ایلیاسٚ نبی‌یه، و تعدادی‌یم گیدی اِرمیایٚ نبی یا ایتأ جٚه پیغمبرأنٚ دیگره.» 15 عیسی وَورسه: «شومأن چی گیدی، مرَ کی دأنیدی؟» 16 شمعونٚ پطرس جواب بدَه: «تو مسیح، خودایٚ زنده پسری!» 17 عیسی بوگفته: «خوشا بحالٚ تو، اَی شمعون، یونا پسر! چونکی اَ حقیقتَ جسم و خون تِره آشکارَ نوکوده، بلکی می آسمانی پئر تِره آشکارَ کوده. 18 منم گم کی تو پطرس ایسی و اَ صخره رو، می کلیسایَ بنا کونم و قودرتٚ مرگ، اونَ حریف نیبه. 19 آسمانٚ پادشایی کلیدأنَ ترَ فدم. اونچی کی زیمینٚ سر دوَدی، آسمانٚ میأنی‌یم دٚوٚسته به و اونچی‌یم زیمینٚ سر وأکونی، آسمانٚ دورونم وأکوده به.» 20 بأزین عیسی خو شاگردأنَ قدغن بوکوده، کسی‌یَ نیگید کی اون مسیحه. عیسی پیشگویی در موردٚ خو مرگ و قیام 21 جٚه او وخت عیسی شروع بوکوده خو شاگردأنَ آگاه کودن کی لازمه بشه اورشلیم تا قومٚ پیله کسأن، سرأنٚ کاهنأن و دینٚ علما دسٚ جأ آزارٚ زیادی بیدینه، بأزین کوشته ببه و سومی روزٚ رِه جٚه دونیای مورده‌یأن قیام بوکونه. 22 پطرس اونَ ایتأ گوشه ببرده و سرزنشٚ اَمرأ بوگفته: «آقا جان، خودا نوکونه اَطو چیزی تی سر بأیه.» 23 عیسی وأگردسته بوگفته: «می جأ دورَ بو، اَی شیطأن! تو می رأیَ دَودی، چونکی تی فیکرأن اینسأنی ایسه نه خودایی.» 24 بأزین خو شاگردأنَ بفرمأسته: «اگه کسی بخوأیه مرَ پیروی بوکونه، وأستی خورَه اینکار بوکونه، خو صلیبَ اوسأنه و می دونبألسر بأیه. 25 چونکی هر کی بخوأیه خو جانَ نجات بده، اونَ جٚه دس دهه؛ ولی هر کی‌یم می وأسی خو جانَ فده، اونَ به دس اَوره. 26 اینسأنٚ رِه چی فایده دأره کی تومامٚ دونیا اونٚ شین ببه، امّا خو جانَ جٚه دس بده؟ بأزین به چی قیمتی تأنه خو جانَ به دس بأوره؟ 27 چونکی اینسأنٚ پسر خو پئرٚ جلال و فرشته‌یأنٚ اَمرأ اَیه و هر کسی‌یَ مطابقٚ اونٚ کارأن پاداش فده. 28 آمین شمرَ گم، بعضی‌یأن اَیه ایسَه‌ییدی کی تا اینسأنٚ پسرَ نیدینید کی خو پادشایی اَمرأ اَیه، طعمٚ مرگَ نچشیدی.» |
© 2010-2019 Gilak Media
Gilak Media