یونس 3 - کیتاب مقدّس به گیلکی (رشتی)

یونس، خوداوندٚ جأ ایطاعت کونه

¹ خوداوند ایوار دِه یونسَ بفرمأسته:

² «ویریز، بوشو نینوا، او پیله‌دأنه شهرٚ دورون و پیغامی‌یَ کی ترَ گم اوشأنَ اعلام بوکون.»

³ یونس ویریشته و هوطو کی خوداوند بوگفته‌بو، بوشو نینوا. نینوا ایتأ پیله‌دأنه شهر بو، اَنقدر پیله‌دأنه کی اگه اینفر بخوأسته‌بی اونٚ دورون بگرده، سه روز طول کشه‌یی.

⁴ یونس شهرٚ دورون واردَ بوسته و ایتأ روزٚ اندازه رأ بوشو، بأزین فریاد بزه و بوگفته: «بعدٚ چهل روز نینوا نابودَ به.»

⁵ نینوا مردومأن، خودا پیغامَ باور بوکودید و اعلام بوکودید کی روزه بیگیرید؛ و همه‌تأن، پیله‌دأنه و کوجه‌دأنه، پلاس دوکودید.

⁶ وختی نینوا پادشا اَ پیغامَ بیشنأوسته، خو تختٚ جأ بیجیر بمو، خو شاهانٚ لیباسَ بکنده و پلاس دوکوده و خاکسترٚ رو بینیشته.

⁷ هو وخت نینوا میأنی پادشا اَطویی فرمان بده: «پادشا و پیله‌ترأنٚ فرمان اَنه کی هیچ اینسأن یا حیوانی، گله یا رمه، حق نأریدی غذا یا آبی بوخورید یا حتی اونَ بچشید.

⁸ همه‌تأن وأستی پلاس دوکونید و ایجگره زنأن خودایَ دوخوأنید و ظلم کودنٚ جأ دس فأکشید و شرارتٚ جأ وأگردید.

⁹ اَمأن نأنیم کی، بلکی خودا خو غیظ و غضبٚ جأ وأگرده و اَمرَ رحم بوکونه تا هلاکَ نیبیم.»

¹⁰ وختی خودا، نینوا مردومأنٚ کارأنَ بیده کی خوشأنٚ شرارتٚ جأ وأگردستید، رحم بوکوده و او بلایی کی خوأستی اوشأنٚ سر بأوره، دِه نأورده.