پیدایش 6 - کیتاب مقدّس به گیلکی (رشتی)

نوحٚ سرگذشت

¹ اَن نوحٚ نسلٚ سرگذشته. نوح ایتأ دوروستکارٚ مردای بو کی خو دورأنٚ میأن پرهیزکار بو و خودا اَمرأ رأ شویی.

² نوح سه‌تأ پسر دأشتی: سام، حام و یافث.

³ در حوضورٚ خودا، دونیا فاسد بو و خوشونتٚ جأ پورَ بوسته.

⁴ خودا زیمینَ فندرسته و بیده کی فاسدَ بوسته، چره کی تومامٚ مردومأن خوشأنٚ رأیَ زیمینٚ سر فاسدَ کوده‌بید.

⁵ پس خودا، نوحَ بوگفته: «تصمیم بیگیفتم تومامٚ نسلٚ بشرَ جٚه بین ببرم، چونکی تومامٚ دونیا اوشأنٚ خوشونتٚ جأ پورَ بوسته. دِه اوشأنَ زیمینٚ اَمرأ نابودَ کونم.

⁶ ایتأ کشتی تِره کوفرٚ چوبٚ جأ چأکون کی چن‌تأ اوطاق بدأره و جٚه بیرون و بودورون اونَ غیرٚ الابه بوکون.

⁷ اَطویی وأ اونَ چأکونی: سیصد ذراع درازا، پنجاه ذراع پهنا و سی ذراع بولندی بدأره.

⁸ اونٚ جور سقفٚ نزدیکی دورتادور روشنایی وأسی یک ذراع فاصله بنه کی پنجره ببه. کشتی ایطرف، ایتأ در بنه و کشتی‌یَ وأ سه طبقه، بیجیر، وسط و بوجور بسازی.

⁹ من هسأ سیل و طوفانَ زیمینٚ سر رأ تأودم کی تومامٚ جاندارأنٚ زنده آسمانٚ جیر نابودَ بید و هرچی زیمینٚ سر وجود دأره جٚه بین شه.

¹⁰ ولی تی اَمرأ عهد و پیمانی دَوَدم. تو، تی پسرأن، تی زن و تی عروسأن وأ با هم بیشید کشتی دورون.

¹¹ و تو وأ جٚه هر جانداری ایتأ جوفت نر و ماده‌یَ تی اَمرأ ببری کشتی دورون کی تی اَمرأ زنده بمأنید.

¹² همه جورٚ حیوان، پرنده و جونده و خزنده، هر کدامٚ جأ ای‌جوفت تی ورجأ بأیید کی زنده بمأنید.

¹³ جٚه هر جورٚ آذوقه کی بتأنید بوخورید انبار بوکون کی تِره و اوشأنٚ رِه خورد و خوراک بدأری.»

¹⁴ و نوح هَه کارأنَ بوکوده. اَطویی، هرچی کی خودا فرمان بده‌بو، انجام بدَه.