پیدایش 3 - کیتاب مقدّس به گیلکی (رشتی)آدم و حوا گوناه کونیدی 1 لأنتی، جٚه تومامٚ جانورأنی کی یهوه، خودا، به وجود بأورده‌بو زیرکتر بو. اون زنَ بوگفته: «رأس رأسی خودا بوگفته: ‹ایجازه نأریدی باغٚ تومامٚ درختأنٚ جأ بوخورید؟›» 2 زن، لأنتی‌یَ بوگفته: «اَمأن ایجازه دأریم کی باغٚ درختأنٚ میوه‌یَ بوخوریم، 3 ولی خودا بوگفته: ‹او درختی کی باغٚ وسط نهَه، اونٚ میوه‌یَ نه بوخورید، نه دس بزنید، نوکونه کی بیمیرید!›» 4 لأنتی، زنَ بوگفته: «یقین بدأن، نیمیریدی! 5 چونکی خودا دأنه اگه اونٚ جأ بوخورید، شیمی چومأن وازَ به و خودا مأنستن خُب و بدٚ جأ آگاه بیدی.» 6 وختی زن بیده کی او درختٚ میوه خوش‌خوراک و چوم‌نوازه، و اونٚ خوردن عاقلترَ بوستنٚ رِه خُبه، پس میوه‌یَ اوسأده بوخورده و خو مردم فأدَه کی اونٚ اَمرأ بو و اون بوخورده. 7 هَطوتأ بوخوردیدی هر دو نفرٚ چومأن وازَ بوسته و بفأمستیدی کی لُختیدی. پس اَنجیلٚ ولگأنَ به هم ببافتیدی و خوشأنَ بپوشأنه‌ییدی. 8 زواله بادٚ موقع بیشنأوستیدی یهوه، خودا، باغٚ میأن رأ شوئون دره، آدم و اونٚ زن، یهوه، خودا حوضورٚ جأ باغٚ درختأنٚ میأن جیگا بوخوردیدی. 9 ولی یهوه، خودا، آدمَ دوخوأده و بوگفته: «کویه ایسه‌یی؟» 10 آدم بوگفته: «تی صدایَ باغٚ دورون بیشنأوستم و بترسئم، چونکی لُخت بوم. هَنٚ وأسی جیگا بوخوردم.» 11 خودا بوگفته: «کی ترَ بوگفته کی لُختی؟ جٚه او درختٚ میوه بوخوردی کی من ترَ بوگفته‌بوم نوخور؟» 12 آدم بوگفته: «اَ زن کی می همدم چأکودی، او میوه‌یَ مرَ فأدَه، منم اونَ بوخوردم.» 13 یهوه، خودا، زنَ بوگفته: «اَن چی کاری بو کی بوکودی؟» زن بوگفته: «لأنتی مرَ گول بزه و من بوخوردم.» 14 یهوه، خودا، لأنتی‌یَ بوگفته: «چونکی اَ کارَ بوکودی، تومامٚ اهلی حیوانأن و تومامٚ وحشی حیوانأنٚ میأن، ملعون ایسی! تومامٚ عمر وأ تی شکمٚ سر رأ بیشی و خاک بوخوری. 15 تو و زنٚ میأن و شیمی تخم و تَرٚکه میأن دوشمنی نهم، اون تی سرَ کوبأنه، و تو اونٚ پا بوزهَ نیش زنی.» 16 و خودا زنَ بوگفته: «تی زایمانٚ دردَ خیلی زیاد کونم؛ دردٚ اَمرأ وأ زأی بأوری. مشتاقٚ تی مرد بی، و اون ترَ سروری کونه.» 17 و خودا آدمَ بوگفته: «چونکی تی زنٚ حرفَ گوش بوکودی و او میوه‌یَ بوخوردی کی ترَ بوگفته‌بوم نوخوری، زیمین تی وأسی نفرین بوبوسته؛ تا وختی کی زنده‌یی رنج و زحمتٚ اَمرأ وأ زیمینٚ جأ نان بوخوری. 18 «تِره واش و تمش به بار اَوره و زیمینٚ گیاهأنَ وأ بوخوری. 19 تی پیشانی عرقٚ اَمرأ وأ نان به دس بأوری، تا وختی کی به خاک وأگردی، کی اونٚ جأ چأکوده بوبوستی، چونکی جٚه خاکی و دوواره خاک بی.» 20 آدم خو زنَ «حوا» نام بنَه چونکی اون، تومامٚ زنده آدمأنٚ مار به. 21 و یهوه، خودا، حیوانأنٚ پوستٚ اَمرأ آدم و اونٚ زنٚ رِه لیباس چأکوده و اوشأنَ بپوشأنه. 22 یهوه، خودا، بوگفته: «هسأ آدم اینفر، اَمی مأنستن بوبوسته کی خُب و بدَ شنأسه، نوکونه خو دسَ درازَ کونه درختٚ حیاتٚ میوه‌یَ بوخوره و تا اَبد زنده بمأنه.» 23 پس یهوه، خودا، آدمَ جٚه باغٚ عدن بیرونَ کوده کی هو زیمینٚ سر کی اونٚ جأ به وجود بمو بو، کشت و کار بوکونه. 24 اون آدمَ جٚه باغٚ عدن بیرونَ کوده و باغٚ عدنٚ طرفٚ شرقی کروبیانَ قرار بدَه، و هَطویم شمشیرٚ آتشینَ، کی هر طرف چرخستی، کی درختٚ حیاتٚ جأ نگهبانی بوکونید. |
© 2010-2019 Gilak Media
Gilak Media