پیدایش 16 - کیتاب مقدّس به گیلکی (رشتی)هاجر و اسماعیل 1 سارای، ابرامٚ زن، زأکی اونٚ‌ره به دونیا نأورده، ولی ایتأ مصری کنیز دأشتی کی اونٚ نام هاجر بو. 2 هَنٚ وسی سارای ابرامَ بوگفته: «خوداوند کی مرَ زأی فنده، پس بوشو می کنیزٚ اَمرأ همخواب بوبو. شاید اون مِره ایتأ زأی به دونیا بأوره» ابرام سارایٚ گبَ گوش بوکوده. 3 دهمی سالی کی ابرام کنعانٚ دورون زندگی کودی، سارای خو کنیز هاجرَ در اختیارٚ خو مرد بنَه. 4 ابرام هاجرٚ اَمرأ همخواب بوبوسته و اون شکم اوسَده. وختی هاجر بفهمسته کی حامله‌یه، خو خانمَ به اونٚ چوم حقیرَ بوسته. 5 پس سارای ابرامَ بوگفته: «تی تقصیره کی من اَطو عذاب کشئن درم. من می کنیزَ ترَ پیش‌کش بوکودم، هسه کی اون بفهمسته حامله‌یه، مرَ به حیساب نأوره. خوداوند بینٚ من و تو داوری بوکونه.» 6 ابرام سارایَ بوگفته: «تی کنیزٚ اختیار تی دس دره. هرچی صلاح دینی انجام بده.» پس سارای هاجرٚ اَمرأ بدرفتاری بوکوده؛ هاجرم اونٚ دس جَا فرار بوکوده. 7 خوداوندٚ فرشته هاجرَ ایتأ چشمه نزدیکی، بیابانٚ دورون ملاقات بوکوده؛ هو چشمه کی «شورٚ» رأ میأن نهَه‌بو 8 و بوگفته: «هاجر، سارایٚ کنیز! جٚه کویه اَمون دری و کویه شوئون دری؟» هاجر جواب بدَه: «می خانم سارایٚ دسٚ جَا فرار کودَن درم.» 9 پس خوداوندٚ فرشته اونَ بوگفته: «وأگرد تی خانمٚ ورجه اونَ کنیزی بوکون.» 10 هَطویم بوگفته: «من تی نسل اَنقدر فراوانَ کونم کی کسی نتأنه اوشأنَ بیشمأره.» 11 بَزین خوداوندٚ فرشته اونَ بوگفته: «هسه تو کی شکم دأری و ایتأ پسر به دونیا اَوری؛ اونٚ نامَ ‹ایسماعیل› بَنه چونکی خوداوند تی درد و رنجٚ جَا وأخبرَ بوسته. 12 اون، اینسانی وحشی به؛ اونٚ دس ضدٚ همه و همه کسٚ دس ضدٚ اون به، و خو برأرأنٚ جَا سیوا زندگی کونه.» 13 هاجر، خوداوندَ اَطویی نام بنَه: «اِل رُئی» چره کی بوگفته: «یَنی راس راسی اَیه اونی کی مرَ دینه، بیدم؟» 14 هَنٚ وسی او چاهی‌یَ کی مابینٚ قادش و بارد، قرار دأره «بِئَرلَحی‌رُئی» دوخوأنیدی. 15 هاجر ایتأ پسر ابرامٚ‌ره به دونیا بأورده و ابرام پسری‌یَ کی هاجر به دونیا بأورده‌بو، «ایسماعیل» نام بنَه. 16 ابرام هشتاد و شیش سال دأشتی کی هاجر ایسماعیلَ به دونیا بأورده. |
© 2010-2019 Gilak Media
Gilak Media