خروج 6 - کیتاب مقدّس به گیلکی (رشتی)1 خوداوند موسایَ بوگفته: «هسأ دینی فرعونٚ اَمرأ چی کونم. من اونَ می پور قوّتٚ دسٚ اَمرأ وادار کونم کی اوشأنَ آزادَ کونه؛ ینی دسأنٚ پور قوّتٚ اَمرأ اوشأنَ جٚه خو سرزیمین بیرونَ کونه.» 2 هَطویم خودا موسایَ بوگفته: «من یهوه ایسم 3 و خودمَ به نامٚ خودای قادرٚ مطلق ایبراهیم و ایسحاق و یعقوبٚ رِه ظاهیرَ کودم ولی مرَ به نامٚ ‹یهوه› بر اوشأن نشنأسأنِئم. 4 می عهد و پیمانم اوشأنٚ اَمرأ برقرار بوکودم و وعده بدم کی کنعانٚ سرزیمینَ، اوشأنَ ببخشم، هو سرزیمینی کی اونٚ دورون غریب بید. 5 مصری‌یأن بنی‌ایسرائیلَ به بردگی فأکشه‌یید و من اوشأنٚ ناله‌یَ بیشنأوستم و می عهد و پیمانَ بیاد بأوردم. 6 بنی‌ایسرائیلَ بوگو: ‹من خوداوند ایسم، و شمرَ مصریأنٚ فعلگی جأ بیرون اَورم. من شمرَ، جٚه اوشأنٚ بردگی آزادَ کونم و می بوجورٚ گیفته بازو و پیله داوری‌یأنٚ مره، شمرَ نجات دهم. 7 اَطویی شمرَ می ورجأ اَورم کی می قوم بیبید و من شیمی خودا بم، بأزین شمرَ حألی به کی من یهوه، شیمی خودا ایسم کی شمرَ جٚه مصریأنٚ فعلگی بیرون بأوردم. 8 و شمرَ به سرزیمینی برم کی راستَ گیفته دسٚ اَمرأ قسم بوخورده‌بوم اونَ ایبراهیم و ایسحاق و یعقوبَ ببخشم و شمرَ او سرزیمینٚ وارث چأکونم. من خوداوند ایسم.›» 9 موسی هر چی بیشنأوسته‌بو بنی‌ایسرائیلٚ رِه واگویا بوکوده ولی اوشأن گوش نوکودیدی چونکی بردگی و سختٚ کارأنٚ جأ اوشأنٚ جان به سر اَمون دوبو. 10 خوداوند موسایَ بوگفته: 11 «بوشو فرعون، مصرٚ پادشایَ بوگو وهل ایسرائیلی‌یأن خو سرزیمینٚ جأ بیشید بیرون.» 12 موسی بوگفته: «اَی خوداوند، هسأ کی بنی‌ایسرائیل می گبأنَ گوش نوکودیدی، فرعون چوطو وأسی گوش بده، چونکی نتأنم خُب گب بزنم؟» 13 بأزین خوداوند موسی و هارونٚ اَمرأ درباره‌یٚ بنی‌ایسرائیل و فرعون، مصرٚ پادشا، گب بزه و اوشأنَ فرمان بده کی بنی‌ایسرائیلَ مصرٚ سرزیمینٚ جأ بیرون ببرید. موسی و هارونٚ شجره‌نامچه 14 قومٚ ایسرائیلٚ خاندانٚ پیله کسأن اَطو بو: رِئوبینٚ پسرأن کی ایسرائیلٚ نخست‌زاده بو: خَنوخ، فَلّو، حِصرون و کَرْمی. اَشأن رِئوبینٚ طایفه‌یأن بید. 15 شمعونٚ پسرأن: یِموئیل، یامین، اوهَد، یاکین، صوحَر و شائول کی اونٚ مار ایتأ کنعانی زنأی بو. اَشأن شمعونٚ طایفه‌یأن بید. 16 لاوی پسرأنٚ نامأن طبقٚ اوشأنٚ شجره‌نامچه اَشأن بید: جِرشون، قُهات و مِراری. لاوی صد و سی و هفت سال عمر بوکوده. 17 جِرشونٚ پسرأن لِبنی و شِمعی بید کی هر کدامٚ جأ ایتأ طایفه به وجود بمو. 18 قُهاتٚ پسرأن: عَمرام، یِصهار، حِبرون و عُزّیئیل. قُهات صد و سی و سه سال عمر بوکوده. 19 مِراری پسرأن: مَحْلی و موشی. اَشأن لاوی طایفه‌یأنٚ نامأن بید طبقٚ اوشأنٚ شجره‌نامچه. 20 عَمرام خو عمجان، یوکابِدٚ اَمرأ عروسی بوکوده و اونٚ جأ هارون و موسی بدونیا بمویید. عَمرام صد و سی و هفت سال عمر بوکوده. 21 یِصهارٚ پسرأن: قورَح، نِفِج و زِکْری. 22 عُزّیئیلٚ پسرأن: میشائیل، اِلصافان و سِتری. 23 هارون، اِلیشابَع اَمرأ عروسی بوکوده کی عَمّینادابٚ دُختر و نَحشونٚ خأخور بو و اونٚ جأ ناداب، اَبیهو، اِلعازار و ایتامار بدونیا بَومویید. 24 قورَحٚ پسرأن: اَسّیر، اِلقانَه و اَبیاساف. اَشأن قورَحٚ طایفه‌یأن بید. 25 اِلعازار، هارونٚ پسر، ایتأ جٚه فوتیئیلٚ دُخترأنَ ببرده و اوشأنٚ رِه ایتأ پسر بوبوسته کی اونٚ ایسم فینِحاس بو. اَشأن لاوی‌یأنٚ خاندانٚ پیله کسأن بید کی هر کدامٚ جأ ایتأ طایفه به وجود بمو. 26 هَه هارون و موسی بید کی خوداوند اَشأنَ بوگفته: «تومامٚ بنی‌ایسرائیل، گروه گروه، ینی تومامٚ ایسرائیلٚ طایفه‌یأنَ، مصرٚ سرزیمینٚ جأ ببردید بیرون.» 27 و هَه موسی و هارون بید کی مصرٚ پادشا، فرعونٚ مره گب بزه‌یید کی بنی‌ایسرائیلَ مصرٚ جأ بیرون بأورید. 28 او روزی کی خوداوند مصرٚ سرزیمینٚ دورون موسی اَمرأ گب بزه، 29 هَطویم بوگفته: «من خوداوندم. هر چی ترَ بوگفتم، مصرٚ پادشا، فرعونٚ رِه واگویا بوکون.» 30 ولی موسی خوداوندَ بوگفته: «جٚه اویه کی نتأنم خُب گب بزنم، چوطو به کی فرعون می گبَ گوش بوکونه؟» |
© 2010-2019 Gilak Media
Gilak Media