خروج 11 - کیتاب مقدّس به گیلکی (رشتی)

بلایی کی ارشدٚ پسرأنٚ سر اَیه

¹ خوداوند موسایَ بوگفته: «ایتأ بلایٚ دیگرم فرعون و مصریأنٚ سر اَورم و اون شمرَ آزادَ کونه کی جٚه اَیه بیشید و اَطویی خودش شمرَ مصرٚ جأ بزور بیرونَ کونه.

² بنی‌ایسرائیلَ بوگو شوئونٚ وخت مردأکأن و زنأکأن خوشأنٚ مصری همساده‌یأنٚ جأ نقره و طلا اسبابأنَ بخوأیید.»

³ خوداوند کاری بوکوده کی بنی‌ایسرائیل مصریأنٚ ورجأ محترم بوبوستیدی و مصرٚ سرزیمینٚ دورون، فرعونٚ خدمتگوزارأن و مردوم، موسایَ پیله کس دأنستیدی.

⁴ پس موسی فرعونَ بوگفته: «خوداوند اَطویی فرمأیه: ‹نیصفٚ شب مصرٚ سرزیمینٚ میأن دوأرم.

⁵ تومامٚ ارشدٚ پسرأن کی مصرٚ میأن ایسَه‌ییدی میریدی، جٚه فرعونٚ اوّلی پسر کی فرعونٚ جانشین ایسه، تا اوّلی پسرٚ هر کنیزی کی کراَ گندمَ آسیاب کودن دره، و چهارپایأنٚ اوّلی زأکم همه میریدی.

⁶ اَجور شیون و گریه زاری مصرٚ میأن بر پا به کی هیکس نشنأوسته و هیکسم نیشنأوه.

⁷ ولی ایسرائیلٚ قومٚ میأن حتی ایتأ سگم، ایتأ آدم یا حیوانٚ رِه لاب نوکونه.› بأزین فهمیدی کی خوداوند بنی‌ایسرائیلَ مصریأنٚ جأ فرق نهه.

⁸ تومامٚ تی خدمتگوزارأن می ورجأ اَییدی، تعظیم کونیدی و گیدی: ‹تو و تومامٚ مردومی کی تی جأ پیروی کونیدی همه‌تأ جٚه اَیه بیشید!› بأزین جٚه اَیه شم.» بعدٚ اَ گبأن، موسی دیم سورخَ بوسته و غیظٚ اَمرأ فرعونَ ترکَ کوده.

⁹ خوداوند موسایَ بوگفته‌بو: «فرعون شیمی گبأنَ گوش نوکونه کی می معجزه‌یأن مصرٚ سرزیمینٚ میأن ویشتر انجام ببه.»

¹⁰ موسی و هارون فرعونٚ چومٚ جُلُو تومامٚ اَ معجزه‌یأنَ آشکارَ کودیدی ولی خوداوند فرعونٚ دیلَ سختَ کوده و فرعون ونأشته کی بنی‌ایسرائیل اونٚ سرزیمینٚ جأ بیشید.