Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

خروج 1 - کیتاب مقدّس به گیلکی (رشتی)


ایسرائیلٚ اسیری

1 ایسرائیلٚ پسرأنٚ نامأن اَشأن ایسید کی هر کدام خوشأنٚ خانواده اَمرأ یعقوبٚ همرأه بوبوستید و بوشویید مصر:

2 رئوبین، شمعون، لاوی و یهودا؛

3 یِساکار، زِبولون و بنیامین؛

4 دان و نفتالی، جاد و اَشیر.

5 یعقوبٚ نسلٚ آدمأن همه همه هفتاد نفر بید و یوسف جٚه پیشترأن مصر زندگی کودی.

6 یوسف و تومامٚ اونٚ برأرأن و هم‌نسلأن بمردید

7 ولی ایسرائیلی‌یأن بارور و زیادَ بوستیدی و اونقدر فراوانَ بوستیدی کی او سرزیمین اوشأنٚ جأ پورَ بوسته.

8 بأزین ایتأ پادشایٚ دیگر مصرٚ حاکم بوبوسته کی یوسفَ نشنأختی.

9 اون خو مردومَ بوگفته: «بیدینید، ایسرائیلی‌یأن اَمی جأ ویشتر و قویتر بوبوستیدی.

10 اوشأنٚ اَمرأ وأ حکمتٚ مره رفتار بوکونیم وگرنه جٚه اَنم ویشترَ بیدی و اگه جنگی بر پا ببه، اَمی دوشمنأنٚ اَمرأ همدس بیدی و اَمی اَمرأ جنگ کونیدی و جٚه اَ سرزیمینم فرار کونیدی شیدی.»

11 پس مصری‌یأن، بنی‌ایسرائیلٚ سرٚ جور سرکارگرأنی بدأشتیدی کی اوشأنَ زور بیگید، کی مجبور بیبید اوشأنٚ رِه کار بوکونید و بنی‌ایسرائیل، فرعونٚ رِه فیتوم و رَمِسیسٚ شهرأنَ بسأختیدی کی جایٚ انبار و تدارکات ببه.

12 ولی هر چی ویشتر اوشأنَ سختی دَییدی، ویشتر زیاد و پخشَ بوستیدی جوری کی مصری‌یأن بنی‌ایسرائیلٚ جأ بوحشت دکفتیدی

13 و اوشأنَ مجبور کودیدی کی به زور کار بوکونید.

14 اوشأنَ مجبورَ کودیدی کی هر جور کارٚ سختَ انجام بدید، مثلٚ خشت زِئن، ملاط چأکودن، و هر جورٚ کارٚ دیگر مزرعه دورون و اَطویی بنی‌ایسرائیلٚ زندگی‌یَ تلخَ کودید. تومامٚ اَ اجباری کارأنٚ اَمرأ بنی‌ایسرائیلی‌یأنٚ مره بی رحمی اَمرأ رفتار کودیدی.

15 مصرٚ پادشا، عبرانی قابله‌یأن کی اوشأنٚ نام شِفْرَه و فوعَه بو، بوگفته:

16 «هَطو‌ کی شومأن عبرانی زنأکأنٚ زأکأنَ بدونیا اَوریدی، اگه بیده‌ییدی پسره اونَ بوکوشید، ولی اگه دُختر بوبوسته، اونَ زنده وئلید.»

17 ولی قابله‌یأن خودا ترس بید و مصرٚ پادشا فرمانَ انجام ندَییدی و وأهشتیدی پسر زأکأنم زنده بمأنید.

18 پس مصرٚ پادشا قابله‌یأنَ دوخوأده و وَورسه: «چره اَ کارَ بوکودید؟ چره پسر زأکأنَ زنده وأهشتید؟»

19 قابله‌یأن، فرعونَ جواب بدَه‌ییدی: «عبرانی زنأکأن مصری زنأکأنٚ مأنستن نی‌ییدی. اوشأن پور قوّت ایسید و قبلٚ اَنکی قابله فأرسه، زأکَ بدونیا اَوریدی.»

20 پس خودا قابله‌یأنَ رحمت بوکوده، و بنی‌ایسرائیلٚ قوم ویشتر و قویتر بوبوسته.

21 چونکی قابله‌یأن خودا ترس بید، خودا اوشأنَ توانایی بدَه کی زأیدار بیبید.

22 پس فرعون تومامٚ مصری‌یأنَ فرمان بدَه: «هر عبرانی پسری کی بدونیا اَیه، نیلٚ روخانٚ دورون تأودید ولی دُخترأنَ زنده وئلید!»

© 2010-2019 Gilak Media

Gilak Media
ကြှနျုပျတို့နောကျလိုကျပါ:



ကြော်ငြာတွေ