استر 7 - کیتاب مقدّس به گیلکی (رشتی)هامانَ دار زنیدی 1 بأزین پادشا و هامان بوشوییدی شهبانو استرٚ مهمانی. 2 دوّمی شام بو، وختی اوشأن شراب خوردن دیبید، پادشا استرَ وَورسه: «شهبانو استر، چی خوأیی کی ترَ فدم؟ تی خوأهش چیسه؟ تا نصفٚ اَ مملکتَ ترَ فدم.» 3 استر بوگفته: «پادشا، اگه مرَ موحبت بوکونید و شِمره خوشایند ببه، ایلتماس کونمه کی می جان و می قومٚ جانٚ جأ بوگذرید 4 چره کی من و می قوم بوفروخته بوبوستیم تا کشته و نابود بیبیم. اگه تنها نوکری و کلفتی وأسی بوفروخته بوبوستیم، می دهنَ دٚوٚستیم، چونکی اَمی مصیبت پادشا ضررٚ ورجأ هیچی به حیساب نأیه.» 5 خشایارشاه شهبانویَ وَورسه: «اون کیسه و کویه ایسَه کی جرأت بوکوده تا اَ کارَ بوکونه؟» 6 استر بوگفته: «اَمی دوشمن و بد خوأه، هَه هامانی ایسه کی اَمی ورجأ ایسَه.» هو وخت هامانٚ دیلٚ زاله، شاه و شهبانو ورجأ آبَ بوسته. 7 پادشا کی شراب خوردن دوبو، غیظٚ اَمرأ ویریشته و کاخٚ باغٚ میأن بوشو ولی هامان، چون بیده کی پادشا جأ اونَ رحمی فَنرسه، اویه بِیسه تا خو جانٚ وأسی دس به دامانٚ شهبانو ببه. 8 هَطو کی پادشا خو کاخٚ باغٚ جأ وأگردسته مهمانی تالارٚ میأن، ایدفعه‌یی هامانَ بیده کی خوره تأوده او تختٚ رو کی استر اونٚ سر لَم بده‌بو. پادشا خیالٚ بد بوکوده و بوگفته: «اَ مردای می کاخٚ دورون، حتی می چومٚ جُلُو شهبانویَ بی‌ایحترامی کودن دره؟» هَطو کی پادشا اَنَ گفتن دوبو، هامانٚ سرمچه‌یَ بپوشأنه‌ییدی، 9 بأزین حربونا، ایتأ جٚه پادشا خواجه‌یأن، بوگفته: «ایتأ دار کی اَنٚ بولندی ۲۳ متر ایسه هامانٚ خانه میأن آماده‌یه. هامان اَ دارَ مردخای وأسی کی خو راپُردٚ اَمرأ، پادشا جانَ نجات بدَه‌بو، آمادَه کوده‌بو.» پادشا بفرمأسته: «هامانَ هو دارٚ جور ببرید.» 10 پس هامانَ هو داری سر کی اونَ مردخای اعدامٚ وأسی آمادَه کوده‌بو دار بزه‌ییدی. هوطویی بو کی پادشا غیظم بوخوفته. |
© 2010-2019 Gilak Media
Gilak Media