استر 4 - کیتاب مقدّس به گیلکی (رشتی)

مردخای، شهبانو استرٚ جأ کومک خوأیه

¹ وختی مردخای تومامٚ اَ کارأنٚ جأ وأخبرَ بوسته، خو لیباسأنَ ژندره مندرَه کوده، پلاس دوکوده و خاکسترَ خو سر فوکوده. بأزین ضجّه و ایجگره زنان شهرٚ میأن بوشو.

² مردخای کاخٚ درٚ جُلُو بمو ولی نتأنستی بودورون بشه چونکی هیکس حق نأشتی پلاسٚ اَمرأ کاخٚ دورون وارد ببه.

³ هر ولایتی‌یَ کی پادشا دستور فأرسه‌یی، یهودیأنٚ میأن ایتأ پیله‌دأنه عزاداری به پا بوستی، روزه گیفتیدی و گریه و زاری کودیدی و خیلی‌یأن پلاس دوکودیدی و خاکسترٚ میأن خوفتیدی.

⁴ وختی ندیمه‌یأن و خواجه‌یأن، استرَ جٚه مردخای کردکارأن وأخبرَ کودید، استر پریشأنَ بوسته و مردخای رِه لیباس اوسه کوده کی خو پلاسَ بیرون بأوره و اوشأنَ دوکونه، ولی مردخای قوبیل نوکوده.

⁵ هو وخت استر ایتأ شاه خواجه‌یأنَ کی هتاک نام دأشتی و اونَ خدمت کودی، دوخوأده و دستور بدَه کی مردخای ورجأ بشه و بیدینه چی ایتفاقی دکفتن دره و چره مردخای اَطویی رفتار کونه.

⁶ بأزین هتاک بوشو مردخای ورجأ کی شهرٚ میدانٚ دورونی، کاخٚ دروازه جُلُو نهَه‌بو.

⁷ مردخای، هرچی کی اونٚ سر بمو، هتاکٚ رِه تعریف بوکوده و مقدارٚ دقیقٚ پولی‌یَ کی هامان قول بده‌بو در عوضٚ کوشتنٚ یهودیأن پادشا خزانه‌یَ فده، اونٚ‌ره بوگفته

⁸ و ایتأ دستخطٚ او دستورَ کی شوشٚ میأن هلاک کودنٚ یهودیأنٚ‌ره بینیویشته بوبوسته، هتاکٚ دس فدَه. مردخای هتاکٚ جأ بخوأسته کی استرٚ ورجأ بشه و او دسخطَ نیشأن بده، اَ ماجرایَ تعریف بوکونه و استرٚ جأ بخوأیه کی پادشا ورجأ بشه و پادشایَ ایلتماس بوکونه کی اونَ و اونٚ قومَ رحم بوکونه.

⁹ بأزین هتاک بوشو تا مردخای پیغامَ استرَ فأرسأنه.

¹⁰ استر، هتاکَ بفرمأسته کی مردخای ورجأ بشه و بگه:

¹¹ «تومامٚ پادشا خدمتکارأن و اونٚ ولایتٚ مردومأن، همه‌تأن دأنیدی کی اگه مردای یا زنأکی پادشا ورجأ، صحنٚ اندرونی میأن بشه بدونٚ اَنکی پادشا اونَ دوخوأنه، تنها ایتأ حوکم اجرا به و اون کشته به، مگر اَنکی پادشا خو طلایی چوگانَ اونٚ طرف درازَ کونه تا اون زنده بمأنه. هسأ سی روزه پادشا مرَ دونخوأده کی اونٚ ورجأ بشم.»

¹² وختی استرٚ پیغامَ، مردخای‌یَ فأرسأنه‌ییدی،

¹³ مردخای استرَ پیام فدَه: «ترَ فیکر نوکون چون شاه کاخٚ میأن زندگی کونی یهودیأنٚ میأن تنها تو زنده مأنی.

¹⁴ هسأ اگه تو ساکیت بیبی، یهودیأنٚ رِه کومک و نجات جایٚ دیگرٚ جأ فأرسه. بأزین تو و تی خاندان همه‌تأن هلاکَ بیدی. و کی دأنه؟ بلکی هَه روزأنٚ وأسی بو کی تو شهبانو بوبوستی!»

¹⁵ استر اَ پیغامَ، مردخای‌یَ اوسه کوده:

¹⁶ «بوشو تومامٚ یهودیأنی کی شوشٚ میأن ایسه‌ییدی‌یَ جمَ کون و اوشأنَ بوگو کی می وأسی روزه بیگیرید و سه روز و سه شب هیچی نوخورید. من و می ندیمه‌یأنم شیمی مأنستنی روزه گیریم. بعدٚ اون پادشا ورجأ شم، گرچه دأنم اَ کار خلافٚ پادشا قانونه. اگه وأستی بیمیرم، میرمه.»

¹⁷ پس مردخای بوشو و هوطویی کی استر دستور بده‌بو بوکوده.