دانیال 11 - کیتاب مقدّس به گیلکی (رشتی)1 بأزین فرشته بوگفته: «اوّلی سالٚ داریوشٚ مادی حکومت، من میکائیلٚ ورجأ بِیسم کی اونٚ جأ حمایت و موحافظت بوکونم. شومال و جنوبٚ پادشایأن 2 «هسأ ایتأ حقیقتَ ترَ گم: سه‌تأ پادشایٚ دیگر، پارسٚ سرزیمینٚ دورون ویریزیدی و بأزین، چارمی پادشا اَیه کی تومامٚ اوشأنٚ جأ خیلی ثروتمندتر به و اونٚ مال و منال باعیث به کی اون قودرتمند ببه و همه‌تأنَ به ضدٚ یونانٚ حکومت انتریکَ بوکونه. 3 بأزین ایتأ پیله پادشا ویریزه و قودرتٚ زیادی اَمرأ حکومت کونه و هرچی کی اونٚ دیل خوأیه انجام دهه. 4 ولی وختی در اوجٚ قودرت ایسه، اونٚ حکومت پاشیدَه به و آسمانٚ چار طرفٚ بادأنٚ اَمرأ تقسیم به. اونٚ نسل، اونٚ حکومت و اونٚ قودرتَ ارث نبره، چره کی اونٚ پادشایی ریشه جأ بکنده به و دیگرأنَ فَده به. 5 «جنوبٚ پادشا قوّت گیره ولی ایتأ جٚه اونٚ سردارأن، پادشا جأ قویتر به و قودرتٚ زیادی اَمرأ خو سلطنتٚ میأن حکمرانی کونه. 6 چند سالی کی گوذره، جنوبٚ پادشا و شومالٚ پادشا همدیگرٚ مره موتحد بیدی. بأزین جنوبٚ پادشا دُختر، شه کی عروسی کودنٚ اَمرأ شومالٚ پادشا مره پیمان دَوده ولی او دُختر نتأنه نفوذی‌یَ کی پادشا سر دأشتی، حفظ بوکونه و او پادشا و اونٚ قودرت دوام نأوره. او دُختر، اونٚ پئر، اونٚ همراهأن و او کسی‌یَ کی اونٚ جأ حمایت کودی تسلیم کونیدی. 7 «بأزین ایتأ جٚه او دُخترٚ فامیلأن پادشا جایَ گیره و شومالٚ پادشا لشکرَ حمله کونه، اونٚ قلعه دورون شه و اوشأنٚ اَمرأ جنگه و پیروزَ به. 8 اون تومامی اوشأنٚ خودایأن و بُتأن و طلایی و نقره‌یی ظرفأنَ خو اَمرأ بره مصر و چند سالی دِه شومالٚ پادشایَ ولَ کونه. 9 او وخت شومالٚ پادشا، جنوبٚ پادشا سرزیمینَ حمله کونه، بأزین عقب‌نشینی کونه و وأگرده خو مملکت. 10 اونٚ پسرأن جنگٚ وأسی آمادَه بیدی، ایتأ پیله‌دأنه لشکرَ جمَ کونیدی و سیلٚ مأنستن کی هیچی نتأنه اونٚ جولُودار ببه دوواره جنگَ تا جنوبٚ پادشا قلعه پیش بریدی. 11 «او وخت جنوبٚ پادشا غیظٚ مره بیرون اَیه و شومالٚ پادشا اَمرأ جنگ کونه. شومالٚ پادشا ایتأ پیله‌دأنه لشکرَ اوسه کونه ولی شکست خوره. 12 جنوبٚ پادشا اَ پیروزی جأ مغرورَ به و ده‌ها هیزار نفرَ کوشه ولی اونٚ پیروزی دوام نأوره، 13 چره کی شومالٚ پادشا ایتأ لشکرَ جمَ کونه کی اونٚ اوّلی لشکرٚ جأ پیله‌تره، و بعدٚ چند سال ایتأ پیله موجهزٚ لشکرٚ اَمرأ وأگرده. 14 «او روزأنٚ میأنی، ایتأ عالمه مردوم به ضدٚ جنوبٚ پادشا ویریزیدی، حتی زورگویأن تی قومٚ جأ قیام کونیدی تا او رویا به انجام فأرسه، ولی موفق نیبیدی. 15 بأزین شومالٚ پادشا اَیه، سنگرأن چأکونه و او حیصاردارٚ شهرَ گیره. جنوبٚ لشکریأنم نتأنید اونٚ جُلُو بئسید، حتی اوشأنٚ بهترین سربازأنم نتأنیدی مقاومت بوکونید. 16 شومالٚ پادشا هر چی اونٚ دیل خوأیه، کونه و هیکس نتأنه اونٚ جُلُو بِیسه. اون، قشنگٚ سرزیمینٚ دورون ایسه و اَ قودرتَ دأره کی اونَ ویرانَ کونه. 17 اون تصمیم گیره کی خو تومامٚ حکومتٚ قوّتٚ اَمرأ بأیه و جنوبٚ پادشا اَمرأ ایتأ پیمان دٚوٚده و ایتأ جٚه خو دُخترأنَ اونَ فده تا اونٚ حکومتَ خرابَ کونه ولی موفق نیبه و اونٚ نقشه شکست خوره. 18 بأزین سرزیمینأنٚ ساحلی اونٚ چومأنَ گیره و خیلی جٚه او سرزیمینأنَ بدس اَوره ولی ایتأ سردارٚ لشکر اونٚ گوستاخی‌یَ جواب دهه و خفّت و خواری اَمرأ بیرونَ کونه. 19 شومالٚ پادشا وأگرده خو سرزیمینٚ قلعه‌یأنٚ طرف ولی موفق نیبه، شکست خوره و دِه اثری اونٚ جأ نمأنه. 20 «بأزین ایتأ پادشایٚ دیگر به قودرت فأرسه. اون خو سلطنتٚ شکوهٚ وأسی ایتأ مأمورَ اوسه کونه تا مردومٚ جأ باج و خراجٚ فیگیره. چند وختٚ بعد اونم هلاکَ به ولی نه مردومٚ غیظٚ جأ یا جنگٚ دورون.» شومالٚ پادشا شرارت 21 بأزین فرشته بوگفته: «ایتأ پست فیطرتٚ آدم ویریزه کی لیاقتٚ سلطنتَ نأره ولی ایوأرکی اَیه و دوز و کلکٚ مره سلطنتَ به دس گیره. 22 اون، لشکری‌یأن و حتی رئیسٚ عهدَ جٚه بین بره و شکست دهه. 23 بعدٚ اَنکی مردومٚ اَمرأ پیمان دٚوٚده، اوشأنَ گول زنه و چند نفرٚ کومکٚ اَمرأ قودرتَ به دس گیره. 24 ایدفعه‌یی سرزیمینأنی‌یَ کی خوروم محصولأن دأریدی حمله کونه و اویه کارأنی کونه کی نه اونٚ پئر بوکوده‌بو، نه اونٚ اجداد. اون هر مال و منالی کی زورٚ اَمرأ فیگیره خو پیروأنٚ میأنی تقسیم کونه، بأزین قلعه‌یأنٚ شکست دَئنٚ رِه نقشه کشه ولی اَ نقشه دوام نأوره. 25 «او وخت دیل و جرأت یأفه و ایتأ پیله لشکرٚ اَمرأ جنوبٚ پادشایَ حمله کونه. جنوبٚ پادشایم ایتأ پیله‌دأنه لشکرٚ قوی مره اونٚ جنگ شه، ولی اونٚ ضد، نقشه‌یأن کشیدی و شکست خوره. 26 کسأنی کی اونٚ سفره جأ خوریدی، تقلا کونیدی کی اونَ بوکوشید و اونٚ لشکر سیلٚ مأنستن بوشوسته به و شه و خیلی‌یأنم میریدی. 27 اَ دوتأ پادشا دیل، سیا به و با اَنکی ایتأ سفره سر نیشینیدی، همدیگرَ دورُغ گیدی ولی موفق نیبیدی، چره کی هو وختٚ معین هنوز فئنرسه. 28 «بأزین شومالٚ پادشا ایتأ عالمه مال و منالٚ اَمرأ وأگرده خو سرزیمین و هو رأ میأنی اونٚ دیل ضدٚ کسأنی به کی خودا اوشأنٚ اَمرأ عهدٚ موقدّس دٚوٚسته‌بو، حمله کونه و هر کاری کی اونٚ دیل خوأیه کونه و بأزین خو سرزیمینٚ دورون شه. 29 «وختٚ تعیین بوبوسته میأن وأگرده و جنوبٚ سرزیمینَ حمله کونه ولی اَی‌دفعه، اوّلی وارٚ اَمرأ توفیر کونه. 30 ‹کتّیمٚ› کشتی‌یأن، اونٚ جُلُو ایسیدی و اون، ترسٚ جأ عقب نیشینه و اونَ عهدٚ موقدّسٚ جأ غیظَ گیره و کسأنی‌یَ کی او عهدٚ جأ وأگردستید رویٚ خوش نیشأن دهه. 31 «اونٚ لشکر، معبدٚ موقدّسَ و اونٚ قلعه‌یَ نجستَ کونید و ونألید دِه هر روز قوربانی بوکونید و معبدٚ دورون ایتأ نجستٚ بُت نیهیدی. 32 او پادشا، دوز و کلکٚ اَمرأ یوهودیأنی‌یَ کی خوشأنٚ عهدَ ایشکنیدی خو مره همرأه کونه ولی خوداشناسأن اَشأنٚ کارٚ اَمرأ مخالفت کونید. 33 «قومٚ حکیمأن خیلی‌یأنَ تعلیم دیهیدی ولی ایتأ دورانٚ میأن اوشأنَ شمشیرٚ اَمرأ کوشید یا آتشٚ دورون تأودید و یا اسیرَ کونید و یا اوشأنَ غارت بوکونید. 34 ولی وختی بکفید، ایپچه کومک اوشأنَ فأرسه. بأزین مردومأنٚ زیادی دوز و کلکٚ اَمرأ اوشأنَ همرأه بیدی. 35 ایتأ عده حکیمأن کفیدی و اَطویی پاک و تیمیز و بی‌عیب بیدی و اَ وضع ایدامه دأره تا آخرٚ زمأن فأرسه، چره کی اونٚ وخت تعیین بوبوسته. 36 «شومالٚ پادشا هرچی اَنٚ دیل خوأیه کونه. اون خورَه جٚه تومامٚ خودایأن بوجورتر دأنه و ضدٚ خودایٚ خودایأن، عجیب و غریبٚ گب زنه و اَ کارأنَ ایدامه دهه، تا زمأنی کی اونٚ وختٚ موجازات فأرسه چره کی هر چی تعیین بوبوسته، ایتفاق دکفه. 37 شومالٚ پادشا نه خو جدٚ خودایَ محل نهِه و نه خودایی‌یَ کی زنأکأن اونَ قوبیل دأریدی و نه هیچ خودایٚ دیگری‌یَ، چره کی خورَه خودایأنٚ جأ بوجورتر دأنه. 38 اون، عوضٚ او خودایأن، قلعه خودایَ پرستش کونه، و خودایی رِه کی اونٚ اجداد نشنأختیدی، طلا، نقره و گیران قیمتٚ سنگأن و با ارزشٚ پیش‌کشی‌یأنَ تقدیم کونه. 39 اَ پادشا خودایٚ بیگانه کومکٚ اَمرأ قایمٚ قلعه‌یأنَ حمله کونه و قودرتٚ کسأنی‌یَ کی اونٚ جأ ایطاعت کونیدی زیادَ کونه و اوشأنَ مردومأنٚ سرٚ جور نهِه و زیمینأنَ اوشأنٚ میأن پاداشٚ وأسی تقسیم کونه. 40 «آخرٚ سر جنوبٚ پادشا اونَ حمله کونه ولی شومالٚ پادشا خو ارابه‌یأن و سوارأن و ایتأ عالمه کشتی‌یأنٚ اَمرأ گردٚ بادٚ مأنستن اونٚ جُلُو ایسه. شومالٚ پادشا سیلٚ مأنستن ایتأ عالمه سرزیمینَ حمله کونه 41 و قشنگٚ سرزیمینٚ دورون شه. سرزیمینأنٚ زیادی اونٚ دس دکفه ولی اَدوم و موآبٚ سرزیمین و عمونیأنٚ پیله کسأن جیویزیدی. 42 اون، دیگر سرزیمینأنَ دس درازی کونه. مصرم اون دسٚ جأ راحت نمأنه. 43 مصرٚ خزانه‌یأنٚ تومامٚ طلا و نقره و گیرانٚ اسبابأنَ خو اختیار گیره و لیبی و کوشٚمردومأن اونَ تسلیم بیدی. 44 ولی خبرأنی کی شومال و مشرقٚ جأ فأرسه اونَ ترسأنه و غیظ و عصبانیتٚ مره بیرون شه تا ایتأ عالمه آدمَ بوکوشه و جٚه بین ببره. 45 خو شاهانه چادرأنَ کوهٚ موقدّس و زیبا میأن کی اونٚ دو طرف دریا نهَه، بر پا کونه. ولی اونٚ اجل فأرسه و میره و هیکسم اونَ کومک نوکونه.» |
© 2010-2019 Gilak Media
Gilak Media