دانیال 1 - کیتاب مقدّس به گیلکی (رشتی)

دانیال و اونٚ دوستأن بابِلٚ میأن

¹ سومی سالٚ یِهویاقیمٚ سلطنت کی یهودا پادشا بو، نبوکدنصر کی بابِلٚ پادشا بو، اورشلیمَ حمله بوکوده و اونَ محاصره بوکوده.

² خوداوند، یِهویاقیم - یهودا اوستانٚ پادشایَ - چن‌تأ ظرفأنٚ موقدّسٚ اَمرأ کی خودا معبدٚ شین بید، نبوکدنصرٚ دس اسیر بوکوده. نبوکدنصر او ظرفأنَ خو اَمرأ بابِلٚ سرزیمینٚ میأن بأورده و اوشأنَ خو خودا خزانه معبدٚ دورون بنَه.

³ بأزین پادشا خو خواجه‌یأنٚ رئیسَ کی اونٚ نام اَشفِناز بو، دستور بدَه چند نفر شاهزاده و اشراف‌زاده کی بنی‌ایسرائیلٚ شین بید، اینتخاب بوکونه و بأوره.

⁴ اَ جوانأن، وأستی بی‌عیب و نقص، خوش بر رو، و یاد گیفتنٚ وأسی زبر و زرنگ، دانا و فهیم بیبید و بابِلی زوان و ادبیاتَ یاد بیگیرید تا بتأنید پادشا کاخٚ دورون خدمت بوکونید.

⁵ پادشا فرمان بده هر روز جٚه خوراک و شرابی کی اونٚ درباریأن خوریدی اوشأنم بوخورید و بعدٚ اَنکی سه سال تعلیم و تربیت بیده‌یید، اوشأنَ پادشا خدمتٚ‌ره بأورید.

⁶ دانیال، حَنَنیا، میشائیل و عَزَریا جٚه قبیله‌یٚ یهودا اوشأنٚ میأن ایسَه‌بید.

⁷ خواجه‌یأنٚ رئیس اوشأنٚ رِه بابِلی نام بنَه: دانیال - بَلطَشَصَّر، حَنَنیا - شَدرَک، میشائیل - میشَک و عَزَریا - عَبِدنِغو.

⁸ ولی دانیال خو اَمرأ تصمیم بیگیفته کی دربارٚ خوراک و شرابٚ اَمرأ خوره نجستَ نوکونه. پس اَشفِنازٚ جأ اَ کارٚ وأسی ایجازه بخوأسته.

⁹ خودا، خواجه‌باشی دیلَ نرمَ کوده کی دانیالَ موحبت و مهربانی بوکونه

¹⁰ ولی اَشفِناز وأگردسته دانیالَ بوگفته: «من پادشا جأ ترسم. اون دستور بدَه شمرَ خورد و خوراک فدم. اگه بیدینه کی جوانأنٚ دیگرٚ جأ ضعیفتر ایسید، می سرَ وَوینه.»

¹¹ پس دانیال او نگهبانی‌یَ کی اَشفِناز اونَ مسئولٚ او چار نفر چأکوده‌بو، بوگفته:

¹² «تو اَمرَ کی تی ختمتگوزأرانیم ده روز ایمتحان بوکون و فقط حبوبات و آب فدن.

¹³ بأزین اَمی دیمَ جوانأنٚ دیگرٚ اَمرأ کی دربارٚ خوراکَ خوریدی موقایسه بوکون و اوطویی کی صلاح دینی اَمی اَمرأ رفتار بوکون.»

¹⁴ اونم قوبیل بوکوده و ده روزٚ میأن اوشأنَ ایمتحان بوکوده.

¹⁵ ده روز کی بوگوذشته، اوشأن جوانأنٚ دیگر جأ کی دربارٚ خوراک خوردیدی قشنگتر و سرٚ حالتر بوبوسته‌بید.

¹⁶ هَنٚ وأسی گوماشته، عوضٚ دربارٚ خوراک و شراب، بازم اوشأنَ حبوبات فدَه.

¹⁷ خودا اَ چارتأ جوانَ دانش و درکی جٚه تومامی‌یٚ ادب و حکمت عطا بوکوده و دانیالَ فهمستنٚ رویایأن و خوابأنٚ جورواجورم ببخشه.

¹⁸ بعدٚ او سه سالی کی پادشا تعیین بوکوده‌بو، اَشفِناز تومامی‌یٚ جوانأنٚ دربارَ نبوکدنصرٚ ورجأ بأورده.

¹⁹ پادشا اوشأنٚ اَمرأ گب بزه. بأزین بیده کی دانیال، حَنَنیا، میشائیل و عَزَریا جٚه همه‌تأن بهتریدی. پس اوشأنَ اینتخاب بوکوده کی اونَ خدمت بوکونید.

²⁰ نبوکدنصر هر سؤالی جٚه حکمت و فهم کی او چارتأ جوانٚ جأ وأورسه‌یی، اوشأنَ ده برابر بهتر جٚه تومامٚ جادوگرأن و افسونگرأنٚ سرتاسرٚ خو مملکت دأنستی

²¹ و دانیال تا اوّلی سالٚ کوروشٚ کبیرٚ شاهنشاهی، دربارٚ دورون خدمت کودی.