Yona 2 - Bbaibbuli y'oLugwere

OYona awuuja oKibbumba

¹ OYona ngʼali omu kida kyʼogunyanyi ogunene nʼasaba ngʼawuuja oKibbumbawe,

² ngʼakoba ati, “Omu bigosi byange nakusabire Musengwa, nʼonjiramu. Nga ndi ansi eeyo e magombe nasabire obubbeeri era nʼowulisisya okwekunga kwange.

³ Wankasukire ansi eeyo omu lwabi, ansi eeyo omu maizi awakira okubba awaabiriri, era amaizi amangi ni gambuunaku; amayengogo gonagona nʼamaizi ageedumbya ni gaika ni bimmooma.

⁴ Awo mudi ni nseega nti ombingire omumaisogo; nga tete tinaliirayo okubonaku eYeekaaluyo entukulye!

⁵ Amaizi gabbaire gammira nga gataka kunjita, olwabi ni luneeruguulirirya, nʼekisubi kyʼoku maizi ni kineebbowanganirya oku mutwe.

⁶ Neinikiire nakimo paka ansi omu maizi eeyo, ansi ensozi e gigitandiikira; ni nseega nti naabba eeyo musibe emirembe gyonagyona. Neye iwe Musengwa iye oKibbumba wange, nʼontoolayo omu kiina ekyo nga ndi mwomi!

⁷ Owenabbaire mpulira ngʼobwomi buwaawo, nakwebukiirye Musengwa era esaala yange nʼeniina e gyoli omu Yeekaaluyo entukulye.

⁸ “Abo abeesibiire oku kusinza ebintu ebinambulamu bafiirwa okusaasira okubandisunire.

⁹ Neye nze, Musengwa, nakwebalyanga omu lwembo ni nkuwa nʼesadaaka. Era ebineeyamanga nabituukiriryanga. Obununuli buzwa eeri niiwe Musengwa.”

¹⁰ Awo oMusengwa nʼalagira ogunyanyi nago ni gusesema oYona oku bukalu.