EZabbuli 98 - Bbaibbuli y'oLugwere

OKibbumba niiye afuga ekyalo

EZabbuli.

¹ Mwembere oMusengwa olwembo oluyaaka, olwʼokubba akolere ebyewuunyisya; olwʼobwezyebwe nʼamaanige amabitiriri, abawanguliire.

² OMusengwa alagire ngʼobwali omununuli, era abanamawanga abalagire obutuukiriryebwe.

³ Ayebukiirye okutakakwe okutakoma nʼobwesigwabwe eeri aBaisirairi. Abantu omu kyalo kyonakyona baboine obununuli bwa Kibbumba waiswe.

⁴ Nywenanywena abʼoku kyalo, mubbookookere oMusengwa olwʼeisangaalo, mujaagaane nga mwemba okumuwuuja.

⁵ Mwembe okuwuuja oMusengwa nga mumukubbira otongoli, mumwembere nʼeigono eriweeweeri nga mukubba otongoli.

⁶ Era nga mufuwa amakondeere nʼonzobe, muceere olwʼeisangaalo omumaiso ga Musengwa iye oKabaka.

⁷ Oleke enyanza ewooge ngʼemuwuuja, nʼebigirimu byonabyona biceere nga bimuwuuja, ekyalo nʼebikirimu byonabyona bimwembere.

⁸ Oleke emiiga gikubbe omu ngalo, nʼensozi gyembere aamo omwisangaalo.

⁹ Oleke byembere omumaiso ga Musengwa, olwʼokubba aiza okusalira ekyalo omusango. Yalikubbembera abantu mu bwenkanya, era yaliramula abantu nga tiyeekubbira.