EZabbuli 91 - Bbaibbuli y'oLugwere

OKibbumba niiye atukuuma

Obwesige bwʼoyo atya oKibbumba.

¹ Nabuli ayaba eeri oNambulaku aMwagaagana okusuna obukuumi, nabuli eyaabbanga omu bukuumi bwʼoyo oWabwezye Bwonabwona,

² yamukobanga ati, “Niiwe ekiirukiro kyange era niiwe olugaga lwange, niiwe oKibbumba wange; niiwe oguneesiga.”

³ Dala niiye eyakununulanga eeri emitego egibategere, nʼeeri okawumpuli ajigirica.

⁴ Iye yakulabiriranga, era omu biyayabye mu wasunanga obukuumi. Obwesigwabwe bwabbanga ngaboyo okukukuumanga.

⁵ Tiwatyenge entiisya yʼobwire, waire akalaso akebalasa omusana,

⁶ ooba olumbe olwiza omu ndikiirya, waire amaani gʼendikiirya agajigirica esaawa omukaaga egyʼomusana.

⁷ Abantu 1,000 abakuliranire bayinza okufa, nʼabantu 10,000 abakweruguuliriirye ni bafa, neye iwe akabbikabbi nandi ni kakutuukaku.

⁸ Waliringirira-bulingiriri nʼobona nʼagago ekibonerezo kyʼomubbimubbi.

⁹ Olwʼokubba osuucirye oMusengwa kiirukirokyo, iye oNambulaku aMwagaagana omukuumiwo,

¹⁰ akabbikabbi tikalikutuukaku, era mpaawo kazigizigi akalituuka oku kisitokyo.

¹¹ Ekyo kityo olwʼokubba yalagiranga abamalaikabe okukukuuma nabuli gyoyaba.

¹² Balikubbaka omu ngalo gyabwe, kaisi nandi weekontola ekigerekyo okwibbaale.

¹³ Walyemyaga ompologoma nʼoyema oku nkongomasaka, walyemyaga ompologoma omukambwe nʼoyema oku mpiri.

¹⁴ OKibbumba akoba ati, “Nalimununula olwʼokubba antaka. Era namukuumanga olwʼokubba angondera.

¹⁵ Oweyansabanga namwirangamu, omu bigosi naabbanga naye. Nalimununula ni mmugulumalya.

¹⁶ Nalimuwangaalya ino era nalimununula.”