EZabbuli 8 - Bbaibbuli y'oLugwere

Ekitiisya kya Kibbumba nʼekitiisya ekiyawaire abantu

Eeri akubbembera abembi. EZabbuli ya Dawudi.

¹ Oo Musengwa, iwe oMusengwa waiswe, obukulu bwʼeriinalyo buboneka nabuli wantu omu kyalo kyonakyona! Era ekitiisyakyo kiboneka paka mwigulu.

² Wayegeserye abaana abatobato nʼebibbuuta okukuwuuja nakusani, omu ngeri eyo nʼosirica abalabebo, nʼabo abakulwanisya.

³ Owenfumintiriza okwigulu eriwabbumbire, nʼomweri nʼenkota ebiwateekere omu bifo byabyo,

⁴ omuntu niikyo eniki-so ekigira nʼomuseegaku? Era omuntu-obuntu, lwaki omulumirwa?

⁵ Wamukolere, nʼabulaku katyayi kati okwagaagana na iwe Kibbumba, era nʼomutiikira engule eyʼekitiisya nʼokumugulumalya.

⁶ Wamuwaire obwezye okufuga ebintu byonabyona ebiwabbumbire. Era ebintu byonabyona wabiteekere ansi wʼobwezyebwe,

⁷ entaama gyonagyona nʼente, nʼebisolo byʼomu kigona,

⁸ nʼebinyonyi nʼenyanyi, nʼebibbumbe ebindi ebibba omu nyanza.

⁹ Oo Musengwa, iwe oMusengwa waiswe, obukulu bwʼeriinalyo buboneka nabuli wantu omu kyalo kyonakyona!