EZabbuli 79 - Bbaibbuli y'oLugwere

Okusabira eigwanga eidembe

EZabbuli yʼAsafu.

¹ Oo Kibbumba, abanamawanga balumbire ekyalokyo, basuucirye eYeekaaluyo entukulye kyomuliko. OYerusaalemi bakirekere gawumpu.

² Emirambo gyʼabaweereryabo bagirekeire binyonyi kulya. Emibiri gyʼabeesigwabo, gisuukire kyokulya kyʼebisolo.

³ Basukire omusaaye gwʼabantubo ooti maizi, omu Yerusaalemi mwonamwona, ni wabulawo kadi abaliika!

⁴ Abaliranwa baiswe batuzuma, abatuli okumpi batunyooma era ni batujerega.

⁵ Oo Musengwa, walitusunguwalira paka di? Mirembe gyonagyona? Eibubalyo lyalyeyongera kusiiriirya ooti musyo?

⁶ Oirye obusungubwo ku mawanga agatakumaite, nʼoku bwakabaka obutakusinza.

⁷ Ekyo kityo olwʼokubba bajigiricirye abʼeibyaire lya Yaakobbo, ni bajigirica nʼobutyami bwabwe.

⁸ Tiwatubonereza olwʼebibbibibbi byʼabazeiza baiswe. Oyanguwe okutukwatira ekisa, olwʼokubba tuwoiremu amaani.

⁹ Oo Kibbumba, omununuli waiswe otubbeere, olwʼekitiisya kyʼeriinalyo. Otununule era otusoniye ebibbibibbi byaiswe olwʼeriinalyo.

¹⁰ Lwaki oleka abanamawanga okutubuulya bati, “OKibbumba waanywe ali yaina?” Weerage omu banamawanga nga tubona, ngʼonyaaŋa olwʼomusaaye gwʼabaweereryabo ogususukire.

¹¹ Owulisisye okukenyera kwʼabasibe. Olwʼobwezyebwo obwʼamaani, onunule abebasaliire ogwʼokufa.

¹² Oo Musengwa, abaliranwa baiswe obasasulemu emirundi musanvu olwʼokukujooga.

¹³ Awo iswe abantubo, entaama gyʼomu kiriisiryokyo, twakwebalyanga bulijo emirembe gyonagyona. Mulembe ku mulembe, twadeebereranga okukuwuuja.