EZabbuli 75 - Bbaibbuli y'oLugwere

OKibbumba niiye omulamuzi

Eeri akubbembera abembi. Okwigono, “Tiwajigirica.” EZabbuli yʼAsafu. Olwembo.

¹ Tukwebalya, Kibbumba, tukwebalya olwʼokubba oli kumpi, era abantu batumula oku byewunyobyo.

² OKibbumba akoba ati, “Nalondere ekiseera ekinaliramuliramu, era naliramula mu bwenkanya.

³ Ekyalo owekitengeeta nʼabantu bonabona abakirimu ni batukuta, ninze ngumya empango gyakyo.

⁴ Nkoba abeepanka nti, ‘Mulekeraawo okwepanka.’ Nʼababbibabbi nti, ‘Mukomye okukubba ebifubba.

⁵ Timwakubbanga ebifubba, waire okutumula nga mwepanka.’ ”

⁶ Okugulumalya tikuzwa buzwaisana, waire bugwaisana waire mwidungu.

⁷ Neye oKibbumba niiye asalawo okwica omuntu, nʼagulumalya ogondi.

⁸ OMusengwa akwaite ekikopo ekiizwire enviinyo egifuukira ogyʼobusungubwe. Agusukira ababbibabbi bonabona oku kyalo ni bagunywa, ni bagumalirawo nakimo.

⁹ Neye nze, nalangiriranga ebyakolere emirembe gyonagyona, nayembanga okuwuuja oKibbumba wa Yaakobbo.

¹⁰ Yalijigirica amaani gʼababbibabbi, neye yalyongera agʼabatuukirirye.