EZabbuli 66 - Bbaibbuli y'oLugwere

Olwembo oluwuuja oKibbumba

Eeri akubbembera abembi. EZabbuli ya Dawudi.

¹ Ekyalo kyonakyona kiwuuje oKibbumba nʼeisangaalo.

² Mwembe oku kitiisya kyʼeriinalye, mumuwuuje omu ngeri emuwa ekitiisya.

³ Mukobe oKibbumba muti, “Ebyokola nga byewunyisya! Olwʼobwezyebwo obwʼamaani, abalabebo omu kutya banyolokoka omumaisogo.

⁴ Ekyalo kyonakyona kikusinza, ni bemba okukuwuuja, bemba okuwuuja eriinalyo.”

⁵ Mwize mubone oKibbumba ebyakola, ebyewunyisya ebyo ebyakolera abantu.

⁶ Enyanza yagisuucirye lukalu, ni bagibitamu na bigere. Eeyo ni tujaagaana olwʼebiyakolere.

⁷ Afuga nʼobwezyebwe emirembe gyonagyona, ateekere amaisoge oku banamawanga. Aale abajeemu abo tibamwepankirangaku.

⁸ Muwuuje oKibbumba waiswe inywe amawanga gonagona, era eigono lyanywe erimuwuuja liwulikikane.

⁹ Niiye atukuuma ni tusigala nga tuli boomi, era taleka ni batuwangula.

¹⁰ Oo Kibbumba, watugezeserye, watulongoire ngʼowebakola efeeza.

¹¹ Watulekere ni tugwa omu mutego nʼotutiika emigogolo egikaluba.

¹² Walekere abalabe baiswe ni batwemyaga oku mitwe, ni tubita omu musyo nʼomu maizi. Neye watutuucirye omu kifo ekyokwesiima.

¹³ Naleetanga omu nyumbayo esadaaka egibooca yonayona. Natuukiriryanga obweyamo bwange egyoli;

¹⁴ ebyo omunwa gwange ebigwabbutwire nʼebinasuubizire owenabbereire omu bigosi.

¹⁵ Naawangayo egyoli esadaaka egibawaayo nga bagyoca yonayona, eyʼebisolo ebisava. Ni mpaayo egyoli esadaaka egibawaayo nga bagyoca yonayona eyʼentaama ensaiza, nʼente emasiniki nʼembuli.

¹⁶ Mwize muwulire inywe nywenanywena abatya oKibbumba, nʼabakobera ebyankoleire.

¹⁷ Namwekungiriire okumbeera, era ni nnyemba okumuwuuja.

¹⁸ Singa nabbaire mbisire ekibbikibbi omu mwoyo gwange, oMusengwa tiyankumpuliire.

¹⁹ Neye dala oKibbumba ampuliire, nʼawulisisya okusaba kwange.

²⁰ OKibbumba bamuwuuje olwʼokubba tagaine okusaba kwange, ooba tantoireku okutakakwe okutakoma.