EZabbuli 65 - Bbaibbuli y'oLugwere

Okuwuuja nʼokwebalya oKibbumba

Eeri akubbembera abembi. EZabbuli ya Dawudi. Olwembo.

¹ Oo Kibbumba, osaanira okukuwuujanga omu Sayuuni era twatuukiriryanga obweyamo bwaiswe egyoli.

² Oo iwe owulira okusaba kwaiswe, abantu bonabona baliiza egyoli.

³ Ebikole byaiswe ebibbibibbi nʼowebitubitiriraku, iwe obitusoniya.

⁴ Wʼenkabi iye oyo ogwolonda nʼomusemberya e gyoli okubbanga omu kifookyo ekitukulye. Twaikutanga ebisa ebyʼomu nyumbayo, ebyʼomu Yeekaaluyo entukulye.

⁵ Oo Kibbumba oMununuli waiswe, otwiramu ngʼokola ebikole ebyʼobutuukirirye ebyentiisya. Abantu bonabona oku kyalo nʼabali oku manyanza agʼe yala bakwesiga niiwe.

⁶ Oli wʼamaani, era olwʼobwezyebwo wateekere ensozi omu bifo byagyo.

⁷ Osirica okuwooga kwʼenyanza, era okuwooga kwʼamayengo gaayo. Osirica okwediima kwʼamawanga.

⁸ Abantu omu kyalo kyonakyona batya ebyewunyo ebyokola. Obaizulya eisangaalo okuzwa amakeezi okutuukira nakimo eigulo.

⁹ Olabirira ekyalo nʼokisukirira, era nʼokijimuca ino. Emiiga gya Kibbumba giizwiremu amaizi, okuwa abantu ebimera, olwʼokubba wategekere otyo ekyalo.

¹⁰ Obulime bwakyo obusukirira amaizi mangi ni bugonda. Eitakali olinyinyintirya oikendi nʼowa ebirime byaku okubala.

¹¹ Omwanka nʼogwigalawo nʼamakungula amangi, nabuli gyobita ogalekawo mu bungi.

¹² Ebiriisiryo ebyʼomwidungu bikubbaku ebisolo, obusozi ni bwizulaku eisangaalo.

¹³ Ebiriisiryo biizwire biraalo, nʼebiinamo biizwire ngaano. Nabuli kintu kiceera era ni kyemba olwʼeisagaalo.