EZabbuli 64 - Bbaibbuli y'oLugwere

Esaala yʼobukuumi

Eeri akubbembera abembi. EZabbuli ya Dawudi.

¹ Oo Kibbumba owulire okwezuluguma kwange. Okuume obwomi bwange eeri entiisya yʼabalabe.

² Onkuume eeri enkwe gyʼababbibabbi, era ondamye eeri ekiziima kyʼababbibabbi abo.

³ Bakolesya endimi gyabwe ooti mpiima enjagalye, era bakasuka ebibono ebikambwe ooti bulaso.

⁴ Beeteegera ni balasa oyo onambulaku omusango, bamuvumbinkirirya ni bamulasa, nga tibatya.

⁵ Bagumyangana nga bategeka okukola obubbibubbi, ni bateesa okutega emitego gyabwe mu kyama, nga bakoba bati, “Naani-so eyagibona?”

⁶ Bateesa ekibbikibbi ni bakoba bati, “Entegeka enu egitukolere, mpaawo ekyagikaisisya.” Ebiseego byʼomuntu omunda omu mwoyogwe, mpaawo ayezya okubitegeera.

⁷ Neye oKibbumba yalibalasa nʼobulaso, amangu ago ni bagwa ansi.

⁸ Ebibono byabwe ebibatumula byalibakangira ni bibajigirica. Bonabona abababona balitengeetya emitwe okubatala.

⁹ Abantu bonabona balitya ni balangirira oKibbumba ebyakola, era ni bafumintiriza kwebyo ebyakola.

¹⁰ Abatuukirirye bajaagaaniranga omu Musengwa, era ni bairukira egyali okubakuuma. Bonabona abalongoole omu myoyo bamuwuujanga.