EZabbuli 63 - Bbaibbuli y'oLugwere

Okutaka eino oKibbumba

EZabbuli ya Dawudi, oweyabbaire omwidungu omu Yuda.

¹ Oo Kibbumba, niiwe oKibbumba wange, nkunoonia nʼomwoyo gwange gwonagwona. Obwomi bwange bukuli nyonta, nʼomubiri gwange gukukandiire ooti kyalo ekikalu ekikandiire, amaizi.

² Nkuboine omu Weemayo, era ni mbona amaanigo nʼekitiisya.

³ Olwʼokubba okutakakwo okutakoma kukirira nakimo obwomi, nakuwuujanga.

⁴ Nakwebalyanga nga nkaali ndi mwomi, nakusabanga nga nsiirirye engalo gyange egyoli.

⁵ Omwoyo gwange gwanogananga ooti muntu aliire ekyokulya ekinoli, era nayembanga nʼeisangaalo okukuwuuja.

⁶ Obwire bwonabwona oku buliri bwange, nkwebukirya ni nkuseegaku.

⁷ Olwʼokubba niiwe obubbeeri bwange; era nnyemba ni njaagaanira omu kiiriirye kyʼebiyayabyo.

⁸ Omwoyo gwange gukwevambaku nʼompanirira nʼamaani agʼengaloyo endiiro.

⁹ Abakiiya okunjita balijigirika, balyaba e magombe.

¹⁰ Balibaita nʼempiima, ni basuuka kyokulya kyʼamakibbwe.

¹¹ Neye okabaka yalijaagaana olwa Kibbumba. Nabuli alayira oKibbumba, yamuwuujanga; neye eminwa gyʼababbeyi bagibbuunangaku.