EZabbuli 6 - Bbaibbuli y'oLugwere

Okusaba nga tuli omu bigosi

Eeri akubbembera abembi. Egibembere nʼebivuga ebyʼenkosi. EZabbuli ya Dawudi.

¹ Oo Musengwa, tiwannenyera omu busungubwo, waire kumbonerezera omu bulwabwo.

² Oo Musengwa onkwatire ekisa, olwʼokubba obwomi busebengerera. Oo Musengwa, ondamye, olwʼokubba amagumba gameketa.

³ Era obwomi bwange buli mu kugada okwʼamaani. Neye Musengwa, walituuca di okutandamya?

⁴ Oo Musengwa oirye omwoyo onnunule, ondamye olwʼekisaakyo.

⁵ Ekyo kityo olwʼokubba mpaawo mufu akwebukirya. Era naani ayezya okukuwuuja e magombe?

⁶ Amaani gampoiremu olwʼokukunga. Nabuli kiire nkulumuca amaliga ni gadodya obuliri bwange, era obuliri bwange ni butoba nʼamaliga.

⁷ Amaiso gange galoolere olwʼenima, tigabona nakusani olwʼamaliga abalabe bange bonabona agebankunja.

⁸ Muzwe e gyendi nywenanywena abakola ebikole ebibbibibbi, olwʼokubba oMusengwa awuliire okukunga kwange.

⁹ OMusengwa awuliire nga mmwekungirira okumbeera, era yairamu okusaba kwange.

¹⁰ Abalabe bange bonabona baliswala ni bibasobera, oKibbumba yalibabbingirira ni baaba mangu mangu nga baswaire!