EZabbuli 57 - Bbaibbuli y'oLugwere

Okusaba oKibbumba okubbeera

Eeri akubbembera abembi. Okwigono, “Tiwajigirica.” EZabbuli ya Dawudi oweyairukire oSawulo, nʼayaba omu mpuku.

¹ Onkwatire ekisa Kibbumba wange, onkwatire ekisa olwʼokubba njirukira eeri niiwe okunkuuma. Nsuna obukuumi mu kiiriirye kyʼebiyayabyo paka entalo owegica.

² Neekungirira Kibbumba oNambulaku aMwagaagana, oKibbumba oyo atuukirirya ebiyantegekeire.

³ Yalisindika obubbeeri okuzwa omwigulu okunnunula, yalikaawukira abanjolonga. OKibbumba yalindaga okutakakwe okutakoma, era yalindaga ngʼobwali omwesigwa.

⁴ Ndi aakati omu balabe abali ooti mpologoma egiri amairu okukaavuula abantu. Amaino gʼabalabe bange gabeesongoirye ooti masimo nʼobulaso. Endimi gyabwe njogi ooti mpiima.

⁵ Oo Kibbumba bakugulumalyenge okubitamu eigulu, oleke ekitiisyakyo kiwoisye ekyalo kyonakyona.

⁶ Abalabe bange bategere omutego okumpapalya, ngoogookere omu bigosi ebimpitiriireku! Bakwire ekiina omu nzira yange, neye ibo abananyere niibo abakigwiremu.

⁷ Oo Kibbumba, omwoyo gwange mugumu, omwoyo gwange mugumu, nayembanga era ni nkuwuuja.

⁸ Olamuke iwe mwoyo gwange, olamuke iwe tongoli era iwe nkana! Nalamuka ngʼemambya ekaali okusala!

⁹ Oo Musengwa nakusisiijiryanga omu bantu. Nayembanga okukuwuuja omu mawanga.

¹⁰ Ekyo kityo olwʼokubba okutakakwo okutakoma kugulumali okutuuka kwigulu. Obwesigwabwo butuuka nʼoku kireri.

¹¹ Oo Kibbumba, bakugulumalyenge okubitamu eigulu, oleke ekitiisyakyo kiwoisye ekyalo kyonakyona.