EZabbuli 55 - Bbaibbuli y'oLugwere

OMusengwa niiye atulamya abʼenkwe

Eeri akubbembera abembi. Egibembera oku bivuga ebyʼenkosi. EZabbuli ya Dawudi.

¹ Oo Kibbumba, otege ekitwi eeri okusaba kwange, tiwagaana okwegairira kwange.

² Ompulisisye era onjiremu. Ebigosi bimbitiriireku era ndi mu kwekedenkerera.

³ Okuceera kwa balabe bange, nʼababbibabbi okunjiigaania, bintiisiriirye. Ekyo kityo olwʼokubba bankolaku obulabe, era omu busungu banteekereku endibo.

⁴ Njizwire obulumi oku mwoyo, ensisi yʼokufa enkwaite.

⁵ Ntiire era ntukuta, ekyekango kingwireku.

⁶ Era nakobere nti, “Singa mbaire nʼamayaya ooti njiiwa, nandigulukire ni nnoonia e ginandisuniire eidembe.

⁷ Nandigulukire ni njaba yala, ni mba eeyo omwidungu.

⁸ Nandisunire mangu aweneebbambika, ni mbawunuka abo abali ooti mpunga owʼamaani era ooti ikendi owʼamabbaale.”

⁹ Oo Musengwa otabuletabule ababbibabbi, era entumula yaabwe ogigotesyegotesye, olwʼokubba mbona bikole byʼobukambwe nʼokayaani omu kibuga.

¹⁰ Omusana nʼobwire batambula nga beeruguuliirirya ekikomera kyʼekibuga ekyo, era mwikyo mwizwire bikole ebibbibibbi na mitawaana.

¹¹ Obutemo niibwo obuli omu kibuga ekyo, okutiisyatiisya nʼobubbeyi tibica omu nguudo gyakyo.

¹² Singa omulabe niiye anzuma, nandikigumiire. Singa ampalana niiye aneepankiraku, nandibbaire mmwebisaku.

¹³ Neye niiwe omunange oguntambula naye, omuntu owange, omukaagwa wange,

¹⁴ ogunnonsyanga naye, ogutukumbaananga naye omu nyumba ya Kibbumba.

¹⁵ Oleke okufa kugwe oku balabe bange kibbwatukira. Oleke baabe e magombe nga bakaali boomi, olwʼokubba ekibbikibbi kibba omu bisito byabwe nʼomu myoyo gyabwe.

¹⁶ Neye nze nasabanga oKibbumba okumbeera, era oMusengwa yannunulanga.

¹⁷ Eigulo nʼamakeezi nʼomusana neezulugumanga ni nkuukulya, nʼawulira eigono lyange.

¹⁸ Yalinjirya nakusani okuzwa omu lutalo olunsetukiireku, waire ngʼabandwanisya bangi.

¹⁹ OKibbumba eyafugire okuzwa eira nʼeira yampulira nga mmwegairira nʼawangula abalabe abo, olwʼokubba tibacuuka okuleka ebikole byabwe, era tibatya oKibbumba.

²⁰ Omuntu owange alumbire abakaagwabe, nʼamenya endagaano egiyakolere nabo.

²¹ Ebibonobye byabbaire binyuma okuwulira okukiraku okukomba amakita, neye nga ekimuli oku mwoyo, lutalo. Nʼebibonobye byabbaire byogi ooti mpiima.

²² Ebigosibyo obikwatisyenge Musengwa, niiye eyakubbeeranga. Tiyalekenge abatuukirirye, abantu okubawangula.

²³ Neye iwe Musengwa, abantu abo abatemo nʼababbeyi walibadyaka omu kiina ekitakoma ngʼemyanka egibandiwangaire bakaali nʼokugituuca aakati. Neye nze neesiganga niiwe.