EZabbuli 52 - Bbaibbuli y'oLugwere

OKibbumba niiye asala omusango

Eeri akubbembera abembi. EZabbuli ya Dawudi, oDowegi oMwedomu oweyaabire nʼakobera oSawulo ati, “ODawudi ayabire omu kisito kyʼAkimereki.”

¹ Iwe owʼamaani, lwaki weepankira omu kibbikibbi? Ekisa kya Kibbumba kinkuuma okumalaku olunaku.

² Osala enkwe okujigirica abandi, ebibonobyo bisala ooti kamweso akoogi, bulijo oyiiya ebyʼobubbeyi.

³ Osiima obubbibubbi okukiraku obusa, era nʼobubbeyi okukiraku amazima.

⁴ Osiima ebibono ebirumya abandi, mubbeyi iwe!

⁵ Neye oKibbumba yalikujigirica emirembe gyonagyona. Yalikwangula omu nyumbayo era nʼakunyiiranyiiramu, nʼakutoola omu kyalo kyʼaboomi.

⁶ Abantu abatuukirirye balibona ni batya. Balikusekerera ni bakoba bati,

⁷ “Obone oyo anandi nʼasuuca oKibbumba okubba olugagalwe, wazira ni yeesiganga busunibwe obubitiriri, nʼokweyongera mu maani ngʼajigirica abandi.”

⁸ Neye nze ndi kusani omu nyumba ya Kibbumba ooti musaale omuzaituuni ogukula kusani. Neesiga kisa kya Kibbumba emirembe nʼemirembe.

⁹ Nakwebalyanga emirembe gyonagyona, era nakwesiganga olwʼebyo ebyokolere. Nabbutulanga omumaiso gʼabatuukiriryebo ngʼobwoli omusa.