EZabbuli 5 - Bbaibbuli y'oLugwere

Okusaba oKibbumba obukuumi

Eeri akubbembera abembi. Ya mulere. EZabbuli ya Dawudi.

¹ Oo Musengwa, owulisisye ebinkusaba, ofeeyo okukukenyera kwange.

² Owulire nga nkwekungirira okumbeera, olwʼokubba ndi kusaba niiwe oKibbumba wange era oKabaka wange.

³ Oo Musengwa, amakeezi owulira eigono lyange. Amakeezi nkusaba, ni nkuumirira okunjiramu.

⁴ Oli Kibbumba atasangaalira obubbibubbi, era akola ekibbikibbi tomwikirirya okubba aamo na iwe.

⁵ Abeekudumbalya tobaikirirya omumaisogo, ocaawa bonabona abakola ebikole ebibbibibbi.

⁶ Ojigirica abo abatumula ebyobubbeyi. OMusengwa acaawira nakimo abaiti nʼababbeyi.

⁷ Neye nze, olwʼokutakakwo okutakoma, naingiranga mu nyumbayo. Nasinziranga mu Yeekaaluyo entukulye, era ni nkotama okukuwa ekitiisya.

⁸ Oo Musengwa, onnungamye okukola ebikole ebyʼobutuukirirye olwʼokubba ndi nʼabalabe, ondage nakusani enzirayo egimba nkwate.

⁹ Abalabe bange ebibono ebibatumula tibyesigika, ekibali oku myoyo ikwo kufafaagania. Ebibono ebiwaana ebibatumula, bifunya ooti kivundi ekizwa omu magombe agebaliikwire.

¹⁰ Oo Kibbumba, obasingisye omusango. Oleke ibo abananyere bagwe omu mitego gyabwe. Obabbinge omumaisogo olwʼebikole byabwe ebingi ebibbibibbi, olwʼokubba bakujeemeire.

¹¹ Neye oleke bonabona abairukira egyoli okubakuuma basangaalenge, oleke bayembenge nʼeisangaalo bulijo. Era obukuumibwo bubabbengeku, awo-so abo bonabona abakutaka bajaagaanenge oku lulwo.

¹² Ekyo kityo olwʼokubba, Musengwa, owa abatuukirirye enkabi. Ekisaakyo kibakuuma ooti ngabo.