EZabbuli 47 - Bbaibbuli y'oLugwere

OKibumba niiye afuga ekyalo kyonakyona

Eeri akubbembera abembi. EZabbuli yʼabʼeibyaire lya Koola.

¹ Mukubbe omu ngalo bantu inywe abʼamawanga gonagona, Mubbookooke enyembo gyʼeisangaalo nga muwuuja oKibbumba,

² olwʼokubba oMusengwa oNambulaku aMwagaagana wʼentiisya. Niiye oKabaka omukulu afuga ekyalo kyonakyona.

³ Yatuwanguliire abʼamawanga, nʼatwezyesya okufuga amawanga ago.

⁴ Yatulondeire ekyalo ekitulimu okubba obusika bwaiswe, ekitwesiimisya iswe eibyaire lya Yaakobbo abaasiima.

⁵ OKibbumba ayabire e ngulu ngʼabantu webaceera olwʼeisangaalo. OMusengwa ayabire e ngulu ngʼabantu webafuwa amakondeere.

⁶ Mwembe okuwuuja oKibbumba, mwembe okumuwuuja. Mwembe okuwuuja oKabaka waiswe, mwembe okumuwuuja.

⁷ Olwʼokubba oKibbumba niiye oKabaka wʼekyalo kyonakyona, mumwembere enyembo egimuwuuja.

⁸ OKibbumba afuga amawanga gonagona, ngʼatyaime oku ntebeye eyʼobwakabaka entukulye.

⁹ Abafugi bʼamawanga bakumbaine nʼabantu ba Kibbumba wa Ibbulaimu. Olwʼokubba oKibbumba niiye afuga abʼekubemberi bʼoku kyalo, oKibbumba bamugulumalyenge ino.