EZabbuli 44 - Bbaibbuli y'oLugwere

OKibbumba niiye atubbeera bulijo

Eeri akubbembera abembi. EZabbuli yʼabʼeibyaire lya Koola.

¹ Oo Kibbumba, twewuliriireku nʼagaiswe, era abazeiza baiswe batulonseirye ebiwakolere omu mulembe gwabwe, omu biseera ebyʼeira.

² Ngʼokolesya obwezyebwo wabbingire abanamawanga, ekyalo kyabwe nʼokiwa abazeiza baiswe. Wasasaigwire abantu abanamawanga, neye abazeiza baiswe nʼobawa eisagaaluko.

³ Abazeiza baiswe tibawangwire ekyalo ekyo nga bakolesya mpiima gyabwe, era tibasunire obuwanguli nga bakolesya maani gaabwe, neye gabbaire maanigo nʼobwezyebwo, era waabbanga nabo olwʼokubba wabbaire obasiima.

⁴ Niiwe oKabaka wange era oKibbumba wange, awa oYaakobbo obuwanguli.

⁵ Okubitira mwiwe tuwangula abalabe baiswe, omu liinalyo ni twemyagira ansi abatusetukiraku.

⁶ Tineesiga akalaso kange, waire empiima yange okundamya.

⁷ Neye niiwe otununula eeri abalabe baiswe, nʼoswaza abatucaawa.

⁸ Twenyumirizanga mu niiwe Kibbumba okumalaku olunaku, era twawuujanga liinalyo emirembe gyonagyona.

⁹ Neye atyanu otulekeswire, nʼotuleka ni tuswala, era tokaali weekubbembera amaje gaiswe omu lutalo.

¹⁰ Watulekere abalabe baiswe ni batwiririrya, era abo abatucaawa ni banyaga nʼebintu byaiswe.

¹¹ Watuwaireyo batwite ooti ntaama egibaaba okusala, nʼotusalaanicirya omu banamawanga.

¹² Watundire abantubo dondolo era nandi nʼogobamu.

¹³ Otusuucirye kizumi eeri abaliranwa baiswe, era ibo abo abatweruguuliriirye batujerega era batunyooma.

¹⁴ Otusuucirye majwalo omu banamawanga, era tuli nseko gyʼabantu abo.

¹⁵ Nswaluka okumalaku olunaku, era njizwire nsoni,

¹⁶ olwʼebibono byʼabo abanjolonga, era abanzuma, nʼolwabalabe nʼabo abanoonia okunyaaŋa.

¹⁷ Ebyo byonabyona bitutuukireku newankubbaire nga titukwerabiire, waire okumenya endagaano egiwakolere na iswe.

¹⁸ Emyoyo gyaiswe tigikuzwangaku, era titujeemerangaku ebiragirobyo.

¹⁹ Neye era watusasaiguliire awali emisege, nʼotuleka omu ndiikirya awayezya okubba okufa.

²⁰ Singa twerabiire eriina lya Kibbumba waiswe, ooba ni tusinza okibbumba owʼabanamawanga,

²¹ ekyo Kibbumba wandikizwire, olwʼokubba iwe omanya ebyama ebibba omu mwoyo.

²² Neye era nabuli lunaku tubba mu kabbikabbi ka kutwita oku lulwo, batubona ngʼabasaanira kufa ooti ntaama ogubatwala omu kibbaagiro.

²³ Oo Musengwa, olamuke! Lwaki ogona? Osisimuke, totulekesula emirembe nʼemirembe!

²⁴ Lwaki otukubbira omugongo? Lwaki tofaayo oku kunyolwa kwaiswe nʼokutugadya?

²⁵ Batudyakire omu nkungu, ni batumigirirya ansi okwitakali.

²⁶ Osetuke otubbeere, olwʼekisaakyo otununule.