EZabbuli 42 - Bbaibbuli y'oLugwere

EKITABO EKYOKUBIRI ( Zab 42–72 ) Eisuubi lyange liri mu Kibbumba

Eeri akubbembera abembi. EZabbuli yʼabʼeibyaire lya Koola.

¹ Ngʼokimaadu owaaluga nʼenyonta yʼamaizi, omwoyo gwange gwona gutyo weguluga okutaka oKibbumba.

² Omwoyo gwange guyayaanira oKibbumba oyo oKibbumba onanyere obwomi. Nalyaba di okusinza oKibbumba?

³ Nkunga omusana nʼobwire era agenkunga gennywa, neenu ngʼabalabe bange bambuulya okumalaku olunaku bati, “OKibbumbawo ali yaina?”

⁴ Omwoyo gwange gwizula enima oweneebukirya ebyʼeira, ngʼowenayabanga nʼekiyindi kyʼabantu, ni nabeekubbemberamu nga twaba omu nyumba ya Kibbumba, nga tuceera olwʼeisangaalo era tubbookooka okumuwuuja, omu kiyindi nga tujaguza.

⁵ Kale atyanu lwaki omwoyo gwange gunakuwala? Era lwaki omwoyo gwange gweraliikirira? Oleke eisuubi lyange nditeeke mu Kibbumba, olwʼokubba nalimuwuuja tete, Iye omununuli wange era oKibbumba wange.

⁶ Omwoyo gwange gunakuwaire! Kagira mmuseegaku nga ndi omu kyalo kyʼe Yoludaani nʼoku Lusozi oKerumooni nʼoku Lusozi oMizali.

⁷ Olwabi lwʼamaizi lweta olwinaye, olwʼokuyiriitira kwʼamaizigo agawolomboga. Amaizigo ageedumbya gaika, nʼamayengogo gonagona ni bimmooma!

⁸ OMusengwa andaga ekisaakye omusana, kaisi obwire ni mmwembera, nga nsaba oKibbumba oyo ampa obwomi.

⁹ Nkoba oKibbumba iye eibbaale lyange omu neebisa, nti, “Lwaki oneerabiire? Lwaki mbaawo nga nkunga olwʼabalabe bange okungadya?”

¹⁰ Ebizumi byʼabalabe bange bindumirirya ooti magumba niigo agammeketa. Basiiba bambuulya bati, “OKibbumbawo ali yaina?”

¹¹ Kale atyanu lwaki omwoyo gwange gunakuwala? Era lwaki omwoyo gwange gweraliikirira? Oleke eisuubi lyange nditeeke mu Kibbumba, olwʼokubba nalimuwuuja tete, Iye omununuli wange era oKibbumba wange.