EZabbuli 4 - Bbaibbuli y'oLugwere

Okwesiga oKibbumba

Eeri akubbembera abembi. Egibembere nʼebivuga ebyʼenkosi. EZabbuli ya Dawudi.

¹ Oo Kibbumba iwe omulwaniriri wange, owenkusaba onjiremu! Owenabbaire omu bigosi, wambeereire. Atyanu onkwatire ekisa, era owulire okusaba kwange.

² Bantu inywe, mwalituuca di okummalamu ekitiisya nga munswaza? Mwalituuca di okutaka ebinambulamu, nʼokukolera oku byobubbeyi?

³ Aale mumanye muti oMusengwa ayawiire abatuukirirye okubba babe. Era oMusengwa owemmusaba, anjiramu.

⁴ Owewabbaawo ekibasunguwalya mwekuume obusungu okutabakolesya ekibbikibbi. Musirinkirire era mufumintirize nga muli oku buliri bwanywe.

⁵ Muweeyo esadaaka egisaanira, era mwesige oMusengwa.

⁶ Bangi beebuulya bati, “Naani eyatukolera ebisa?” Oo Musengwa oganye ekitangaala kyʼamaisogo kitwakire!

⁷ Neye ompaire eisangaalo eryʼamaani okukiraku abandi abali nʼebyokulya ebyʼempeke ebingi nʼenviinyo gyabwe enyingi.

⁸ Nnambaala ni ngona mwidembe, olwʼokubba niiwe wenkani, Musengwa, onkuuma ni mba mwidembe.