EZabbuli 32 - Bbaibbuli y'oLugwere

Okwenenya nʼokusoniya

EZabbuli ya Dawudi.

¹ Wʼenkabi iye oyo oKibbumba ogwasoniyire, oyo ogwatoireku ebibbibibbibye.

² Wʼenkabi omuntu oyo oMusengwa ogwatabalira ekibbikibbi, era onambulamu obubbeyi.

³ Owenabisabisanga ekikole ekibbikibbi ekinkolere, nagogobanga olwʼokukunganga ni mmalaku olunaku.

⁴ Ekyo kityo olwʼokubba omusana nʼobwire, wambonerezanga ino, amaani ni gampweramu nakimo ooti maizi owegakala omwibbugumu okweisana.

⁵ Awo ni nkubbutuliranga ebikole byange ebibbibibbi, era nandi ni njirayo okubisabisanga ebikole byange ebibbibibbi. Ni nkoba nti, “Oleke mbutulire oMusengwa ebikole byange ebibbibibbi.” Era wena nʼonsoniya omusango gwʼebikole byange ebibbibibbi.

⁶ Nʼolwekyo oleke nabuli mutuukirirye akwegairirenge ngʼokaali oyezya okuboneka. Dala ebigosi ebyʼamaani ooti mataba, owebyaizanga tibyamutuukengeku.

⁷ Niiwe ekiirukiro kyange, ondamya nga ndi omu bigosi abantu ni babbookooka enyembo olwʼokubba onnunwire.

⁸ OMusengwa akoba ati, “Nakuleegeranga era ni nkwegesyanga enzira egiwakwatanga. Nakulungamyanga era ni nkulabiriranga.

⁹ Timwabbanga basirusiru ooti mbalaasi ooba ooti kisolo onasigirya. Ibyo bidamba amalabuki, era babifuga nga babiteekeremu byoma omu minwa nʼemiguwa omu bifubba, nga tikiikyo tibiigerera e gyoli.”

¹⁰ Ababbibabbi nga bagada ino, neye ekisa kya Musengwa, kibba eeri iye oyo amwesiga.

¹¹ Musangaale era mujaagaane inywe abatuukirirye, olwʼebyo oMusengwa ebyakola. Nywenanywena abamugondera muceere olwʼeisangaalo.