EZabbuli 28 - Bbaibbuli y'oLugwere

Esaala yʼobubbeeri

EZabbuli ya Dawudi.

¹ Nkwegairira iwe Musengwa eibbaale lyange omu neebisa. Tiwagaana okumpulisisya. Era singa wasirika obusiriki, nasenja abo abaabire e magombe.

² Owulisisye nga nkwekungirira okunkwatira ekisa, era nga nkusaba okumbeera nga nsiirirye engalo gyange ngiringiriirye eKifokyo eKitukulye eIno.

³ Tiwantwalirya aamo nʼabantu ababbibabbi, era abo abakola ebibbibibbi. Batumula kusani na bainaabwe, neye nga omu myoyo gyabwe mulimu nkwe.

⁴ Obasasule olwʼebikole byabwe, era kusinzirira ku bubbibubbi bwʼebikole byabwe. Obasasule kusinzirira ku biibyo ebibakola, era obawe ebyo ebibasaanira okusuna.

⁵ Olwʼokubba tibafaayo oku bintu oMusengwa ebyakola, waire ebyo ebiyakolere nʼengalogye, yalibijigirica era tete tiyalibairyawo naire.

⁶ OMusengwa bamuwuuje, olwʼokubba awuliire nga mmwekungirira okunkwatira ekisa.

⁷ OMusengwa niiye ampa amaani, era niiye engabo yange. Mmwesiga nʼomwoyo gwange gwonagwona. Ambeera era omwoyo gwange ni gwizula eisangaalo, era ni nnyemba okumuwuuja.

⁸ OMusengwa niiye awa abantube amaani. Niiye obukuumi era omununuli wʼoyo oguyasukireku amafuta.

⁹ Onunule abantubo! Owe abantubo okububwo enkabi. Niiwe obbe omulabiriri waabwe, era ngʼobalera emirembe gyonagyona.