EZabbuli 26 - Bbaibbuli y'oLugwere

Okusaba kwʼonambulaku omusango

EZabbuli ya Dawudi.

¹ Oo Musengwa, olangirire ngʼowembulaku omusango, olwʼokubba mpaawo kibbikibbi ekinkolanga, era neesiga niiwe Musengwa anambula kubuusabuusa.

² Onkeme, Musengwa, ongezyesye, okebere omwoyo gwange nʼenseega yange,

³ olwʼokubba bulijo ekisaakyo niikyo ekineekubbembera, era ntambulira mu mazimago bulijo.

⁴ Tinkolagana nʼabantu ababbeyi, waire kweyimbya nʼabananfunsi.

⁵ Ncaawa omukumbo gwʼabakola ebibbibibbi, era tinkolagana nʼababbibabbi.

⁶ Oo Musengwa, nnaaba omu ngalo okulaga nga mbulaku musango, kaisi ni nkusinza nga neeruguulya ekyotokyo,

⁷ nga wembookooka olwembo olwʼokukwebalya era nga ntumula oku byewunyobyo ebyʼamaani ebyokola.

⁸ Oo Musengwa, nga ntaka enyumbayo omwobba, ekifo ekitiisyakyo omukibba.

⁹ Tiwamalawo obwomi bwange aamo nʼabakola ebibbibibbi, waire ngʼobwokola abatemo.

¹⁰ Ibo abo omu ngalo gyabwe mulimu ntegeka gya bubbibubbi, era babba mu kulya nguzi bulijo.

¹¹ Neye nze nkola kiidi ekituuce. Onkwatire ekisa onnunule.

¹² E gyendi mpaawo kabbikabbi, nawuujanga oMusengwa omu nkumbaana enene.