EZabbuli 25 - Bbaibbuli y'oLugwere

Okwegairira oMusengwa

EZabbuli ya Dawudi.

¹ Oo Musengwa, neewaayo egyoli.

² Oo Kibbumba wange, niiwe oguneesiga, tiwandeka ni nswala, tiwaganya abalabe bange okumpangula.

³ Dala abakwesiga tiwalibaganya ni baswala, neye abo abʼenkwe obaleka ni baswala.

⁴ Oo Musengwa, ondage amanzirago, onjegesye okutambulira omu busindebwo.

⁵ Onnungamye omu mazimago era oganjegesye olwʼokubba niiwe oKibbumba omununuli wange, era eisuubi lyange libba mu niiwe okumalaku olunaku.

⁶ Oo Musengwa, oyebukirye okusaasirakwo nʼekisaakyo, ebiwalagire okuzwa eira nʼeira.

⁷ Tiwayebukirya ebikole ebibbibibbi ebyʼomu maisuka gange waire ebyobujeemu byange. Neye onjebukirirye mu kutakakwo okwenkalaakalira, oo Musengwa iwe omusa.

⁸ OMusengwa musa era mutuuce, nʼolwekyo alungamya ababbibabbi omu manzirage.

⁹ Alungamya abawombeeki omu kukola ebintu ebituuce, era nʼabeegesya okukwata amanzirage.

¹⁰ Amanzira ga Musengwa gonagona galimu ekisa nʼobwesigwa, eeri abo abatuukirirya endagaanoye nʼebiragirobye.

¹¹ Oo Musengwa olwʼeriinalyo, onsoniye ebibbibibbi byange newankubbaire nga bingi.

¹² Muntuki atya oMusengwa? Oyo niiye oMusengwa oguyalungamyanga omu nzira egyasaaniire okukwata.

¹³ Omuntu oyo yaabbanga nʼebyobusuni era eibyairerye lyalisikira ekyalo.

¹⁴ OMusengwa abba mukaagwa wʼabo abamutya, era abamanyikisya endagaanoye.

¹⁵ Amaiso gange ngateeka ku Musengwa okumbeera enaku gyonagyona, olwʼokubba niiye antoola omu kabbikabbi.

¹⁶ Oo Musengwa, ondoleku, era onsaasire, olwʼokubba nsigaire zenkani era ngada.

¹⁷ Ebigosi byeyongeire omu mwoyo gwange, onnunule omu kugada kunu.

¹⁸ Obone okugada okwendimu, nʼebigosi byange era onsoniye ebikole byange ebibbibibbi byonabyona.

¹⁹ Obone abalabe bange ngʼowebali abangi, obone ngʼowebanteekereku ekinakoolo ekyʼamaani.

²⁰ Okuume obwomi bwange era ondamye; tiwanganya okuswala, olwʼokubba njirukira eeri niiwe okunkuuma.

²¹ Obusa bwange nʼamazima gange binkuumenge, olwʼokubba niiwe oguneesiga.

²² Oo Kibbumba, onunule oIsirairi ibo abantubo omu bigosi byabwe byonabyona.