EZabbuli 24 - Bbaibbuli y'oLugwere

OKibbumba niiye okabaka owʼentiisya

EZabbuli ya Dawudi.

¹ Ekyalo nʼebintu byonabyona ebirimu bya Musengwa. Era ekyalo nʼabantu baamu bonabona, niiye onanyerebyo.

² Ekyo kityo olwʼokubba niiye eyakomekere ekyalo oku nyanza enene, era nʼakigumirya oku maizi amangi agali ansi eino owʼeitakali.

³ Naani ogubaikirirya okuniina oku lusozi lwa Musengwa? Era naani ayinza okwemerera omu kifookye ekitukulye omwabba?

⁴ Abo bonkani abakola ebisa, era abaseega ku biibyo oKibbumba ebyasiima byonkani. Era abatawaayo obwomi bwabwe okusinza ebifaananyi, era nga tibalayira ebyobubbeyi.

⁵ Abantu abo oMusengwa abawa enkabi, era abawa obutuukirirye iye omununuli waabwe.

⁶ Abantu abatyo niibo abamunoonia, era ni bamusinza oyo oKibbumba wa Yaakobbo.

⁷ Inywe amageeti mweigule era na inywe emiryango egyʼeira mweigule, era muganye oKabaka owʼentiisya aingire.

⁸ OKabaka owʼentiisya oyo niiye onaani? Niiye oMusengwa owʼamaani era owʼobwezye. Niiye oMusengwa omuwanguli omu lutalo.

⁹ Inywe amageeti mweigule era na inywe emiryango egyʼeira mweigule, era muganye oKabaka owʼentiisya aingire.

¹⁰ OKabaka owʼentiisya oyo niiye onaani? Niiye oMusengwa oWabwezye Bwonabwona, oyo oKabaka owʼentiisya.