EZabbuli 20 - Bbaibbuli y'oLugwere

Okusabira okabaka obuwanguli

Eeri akubbembera abembi. EZabbuli Dawudi.

¹ Nsaba oMusengwa airengemu okusabakwo ngʼoli omu bigosi. Era nsaba oKibbumba wa Yaakobbo akukuumenge.

² Nsaba akuweereryenge obubbeeri ngʼasinzirira omu Weemaye, era akujejerenge ngʼasinzirira omu Sayuuni.

³ Nsaba ayebukiryenge ebyowaayo byonabyona, era aikiriryenge esadaakayo egibooca yonayona.

⁴ Nsaba akuwenge ebiweegomba, era atuukiriryenge entegekagyo gyonagyona.

⁵ Awo twakubbanga olukero olwʼeisangaalo ngʼowangwire, era twajaagaananga olwʼobuwanguli omu liina lya Kibbumba. Era nsaba oMusengwa akuwenge byonabyona ebiwamusabanga.

⁶ Atyanu mmaite ngʼoMusengwa anunula okabaka oyo oguyasukireku amafuta. Amwiramu ngʼasinzirira omwigululye eritukulye, era amununula ngʼakolesya engaloye endiiro eyʼamaani amabitiriri.

⁷ Abamo beesiga bigaali, nʼabandi beesiga mbalaasi, neye iswe twesige oMusengwa iye oKibbumba waiswe.

⁸ Abo ibo abeesiga ebyo beesiitaala ni bagwa, neye iswe tusetuka ni twemerera.

⁹ Oo Musengwa, onunule okabaka. Otwirengemu owetwakusabanga okutubbeera.