EZabbuli 17 - Bbaibbuli y'oLugwere

Esaala ya Dawudi.

¹ Oo Musengwa, owulisisye okwewozyaku kwange olamule omu bwenkanya. Owulire okwekunga kwange ombeere. Otege ekitwi eeri okusaba kwange okunambulamu bubbeyi.

² Niiwe obbe olamule ngʼowembulaku omusango, olwʼokubba niiwe abona ekituuce.

³ Ogezeserye ebiseego byange era nʼokebera nʼomwoyo gwange obwire. Waneekenenyere era nandi nʼonjajiryamu nsobi. Ndi mumaliriri okutasobya omu ntumula.

⁴ Oku bikwata oku bikole byʼabantu, olwʼekibonokyo neewala amanzira gʼabakola ebikole byʼobukambwe.

⁵ Bulijo nsengereiryenge biibyo ebiwandagiire, era tincaamangaku naire.

⁶ Oo Kibbumba, nkusaba niiwe, olwʼokubba oiramu okusaba kwange. Ontegere ekitwi, era owulire okusaba kwange.

⁷ Ondage ekisaakyo omu ngeri eyeewunyisya, iwe onunula nʼengaloyo endiiro, abairukira egyoli okubakuuma eeri abalabe baabwe.

⁸ Onkuume ngʼobwokuuma emunge yʼeriisolyo, ombise omu kiiriirye kyʼebiyayabyo.

⁹ Ondamye ababbibabbi abannumba, era eeri abalabe bange abo abakabbikabbi abanzingiza.

¹⁰ Bʼemyoyo miirugazu era batumula na idumi.

¹¹ Banjiiga nga banzingiza nabuli e gincuukira, nga banoonia kakisa kʼokunjita.

¹² Bali ooti mpologoma aali nzala okunyiiranyiira ekyayiigire, era bali ooti mpologoma okitobba ayeebisire, ngʼajunjumiriire okukwata ekyayiiga.

¹³ Oo Musengwa, osetukiremu obalwanisye, era obawangule. Ondamye ababbibabbi ngʼokolesya empiimayo.

¹⁴ Oo Musengwa, ngʼokolesya engaloyo eyʼamaani ondamye abantu abo abʼoku kyalo kunu, ibo abali nʼomugabo mu bwomi bunu. Era basune ekibonerezo kyabwe ekiwabategekeire, abaana baabwe basune ekibamala nʼabaizukulu bona bakisikire.

¹⁵ Neye nze nalibba omumaisogo olwʼokubba tinabbengere omusango. Era nalyesiima owenaliramukira ni nkubona maiso ku maiso.