EZabbuli 146 - Bbaibbuli y'oLugwere

Okuwuuja oMusengwa

¹ Muwuuje oMusengwa. Mwoyo gwange, owuuje oMusengwa.

² Nawuujanga oMusengwa obwomi bwange bwonabwona; nayembanga okuwuuja oKibbumba nga nkaali mwomi.

³ Timwesiganga abafugi, ibo abantu-obuntu abatayezya okununula.

⁴ Owebafa, bakanga mwitakali; oku lunaku olunanyere olwo entegeka gyabwe lugifeera.

⁵ Wʼenkabi iye oyo ngʼoKibbumba wa Yaakobbo niiye obubbeeribwe, iye oyo ngʼeisuubirye liri mu Musengwa iye oKibbumbawe,

⁶ iye eyakolere eigulu nʼekyalo, nʼenyanza nʼebigirimu byonabyona, iye oMusengwa asigala nga mwesigwa emirembe gyonagyona.

⁷ Alamula mu bwenkanya abo abebagadya, era awa abanzalwa ekyokulya. OMusengwa ateera abasibe,

⁸ oMusengwa alibulya amaiso gʼaboofu. OMusengwa airyamu amaani abo abanafuwire; oMusengwa ataka abatuukirirye.

⁹ OMusengwa akuuma abasenze, nʼabbeera abanamwandu nʼabafuubbi, neye afafaagania ababbibabbi.

¹⁰ OMusengwa afuga emirembe gyonagyona. Iwe Sayuuni, oKibbumbawo afuga emirembe nʼemirembe. Muwuuje oMusengwa.