EZabbuli 144 - Bbaibbuli y'oLugwere

Okwebalya oMusengwa olwʼobuwanguli

EZabbuli ya Dawudi.

¹ OMusengwa bamuwuujenge iye oyo eibbaale lyange omuneebisa, iye oyo anjegesya okulwana entalo iye oyo antegeka okulwana.

² Niiye ali nʼokutaka okutakoma egyendi, era ekikomera kyange ekiwanvu. Niiye olugaga lwange, era omununuli wange, niiye engabo yange era egyali ginjirukira okusuna obukuumi, oyo niiye aica amawanga ansi wange.

³ Oo Musengwa, lwaki olumirwa omuntu-obuntu? Era omuntu niki-so ekigira nʼomuseegaku?

⁴ Omuntu abbaawo kaseera-buseera ooti mwota; enakugye ntono ooti kiiriirye ekigotawo mangu.

⁵ Oo Musengwa obiikule eigululyo, era oike ansi; okwate oku nsozi, kaisi giduunye omwosi.

⁶ Osindike okumesya, era osalaanice abalabebo. Olase obulasobwo obatiringanisye.

⁷ Ogolole engaloyo ngʼosinzirira omwigulu; ontaase era onnunule okuzwa omu maizi amangi, okuzwa omu bwezye bwʼabanamawanga,

⁸ ibo abo abatatumula amazima, era abalayira nʼebyobubbeyi.

⁹ Oo Kibbumba, nakwemberanga olwembo oluyaaka; nakukubbiranga enkana eyʼenkosi eikumi nga wenkwembera.

¹⁰ Iwe awa abakabaka obuwanguli, iwe akuuma omuweereryawo oDawudi eeri empiima eyʼakabbikabbi.

¹¹ Ontaase era onnunule okuzwa omu bwezye bwʼabanamawanga, ibo abo abatatumula amazima era abalayira nʼebyobubbeyi.

¹² Oganye abataane baiswe omu mavuvuka gaabwe bakule nakusani, ooti bimera ebikulire nakusani, nʼabaala baiswe baboneke nakusani ooti bikondo ebikulungule owebiwonekesya kusani olubiri.

¹³ Ebideero byaiswe biizule nga mulimu amakungula aga buli ngeri. Entaama gyaiswe gibyalagane ensaiza nʼenkali omu biriisiryo byaiswe.

¹⁴ Oganye ente gyaiswe gibyalagane, nga tigisumula waire okufiisya. Tiwaabbaawo kuvunia bikomera nga mpaawo kwaba mu buwambe, nga mpaawo kukuukulya omu bifo byaiswe.

¹⁵ Bʼenkabi abantu abo oKibbumba abaakolera ebintu ebyo; Bʼenkabi ibo abo ngʼoMusengwa niiye oKibbumba waabwe.