EZabbuli 142 - Bbaibbuli y'oLugwere

Okusaba oMusengwa obubbeeri

Esaala ya Dawudi oweyabbaire omu mpuku.

¹ Neekungirira oMusengwa, neegairira oMusengwa okunkwatira ekisa.

² Mmusukaanirya ebinnuma; mmukobera ebigosi byange.

³ Owemba mpoiremu amaani, niiwe amanya ekyendi nʼokukola. Omu nzira omu mbita, abalabe bange bantegeremu omutego omu mbiso.

⁴ Owendola aawo e gyendi mbona nga mpaawo anfaaku, era mpaawo awokwirukira okusuna obukuumi. Mpaawo afaayo oku bwomi bwange.

⁵ Oo Musengwa, nakwekungirira niiwe, ni nkoba nti, “Niiwe ekiirukiro kyange, niiwe owange omu kyalo kyʼaboomi.”

⁶ Owulisisye okwekunga kwange, olwʼokubba ndi omu bwetaavu bubitiriri! Onnunule eeri abanjiigaania, olwʼokubba bankiraku ino amaani.

⁷ Ontoole omu busibe obwo kaisi nkuwuujenge. Awo abatuukirirye bakumbaaniranga e gyendi olwa busaabwo egyendi.