EZabbuli 141 - Bbaibbuli y'oLugwere

Esaala eyʼakanaigulo

EZabbuli ya Dawudi.

¹ Oo Musengwa, nakwekungirira, oyanguwe okumbeera. Ompulisisye nga nkusaba.

² Oganye esaala yange etuuke e gyoli ngʼokuduunya kwʼobubbaani, nʼokusiirya engalo gyange omu kusaba kubbe ngʼesadaaka eyʼakanaigulo.

³ Oo Musengwa, ofuge entumula yange, ombuuneku omunwa gwange.

⁴ Tiwaganya omwoyo gwange ni gwegomba okukola ekibbikibbi kyonakyona, tiwaguganya okwemigira omu bibbibibbi, nʼomu mukumbo nʼabakola ebibbibibbi era tiwaganyanga ni nabeegaitaku omu kulya embaga gyabwe.

⁵ Oganye omuntu omutuukirirye ambonereze, ekyo kintu ekyʼekisa; oganye annenye, ekyo kirongoola ooti mafuta agebansukire oku mutwe. Ekyo tinkigaana. Neye esaala yange bulijo eyakanisya ebikole byʼabakola ebibbibibbi.

⁶ Abafugi baabwe balibadyaka okuzwa e ngulu okwibbaale eriwanvu, awo ababbibabbi webalimanyira bati ebibonobyo Musengwa byʼamazima.

⁷ Awo balikoba bati, “Ngʼowebadaata era ni bakankadyaga eitakali, batyo webalikankadyaga amagumba gaiswe oku mugo gwʼamagombe.”

⁸ Neye iwe Kibbumba, oMusengwa wange niiwe oguneesiga; njirukira giri niiwe okunkuuma; tiwandeka ni nfa!

⁹ Ontaase emitego egibantegere, era entuula ababbibabbi egibategere.

¹⁰ Oleke ababbibabbi bagwe omu ntuula abananyere egibategere, neye nze nga neebitira mwidembe.